Nore Neset vann KM-finale

Nore Neset sitt jenter 97-lag består i hovudsak av 98-jenter. Det hindra dei ikkje i å bli krinsmeistrar.

Kjetil Vasby Bruarøymandag 15. nov. 2010 10:57

Nore Neset sitt småjentelag vann i går 3-1 (2-0) i ein jamn og spennande KM-finale mot Tyssedal i Vestlandshallen.

- Motstandarane var best i starten og slutten av kampen, men vi fekk nokre fine skåringar og sånt kan det bli siger av, seier Arve Grindevoll.

Grindevoll leia laget i hovudtrenar Jarle Heltne sitt fråvær.

- Det var veldig kjekt å få leia jentene i ein KM-finale, spesielt når dei vann, ler Arve.

Skåra på frispark
Etter 10 minutt med press imot fekk Nore Neset frispark. Miriam Askvik skåra, og sto også bak 2-0-målet før pause.

- Då kom målet etter eit innkast og litt fram og tilbake i feltet.

Norenesingane hadde bra kontroll i starten av andre omgang, og då Li Nguyn kom åleine med keeper skuffa ho ikkje.

- På 3-0 såg eg at jentene blei litt for nøgd. Tyssedal kom tilbake og overtok styringa, skapte nokre store sjansar, men skåra heldigvis berre på ein av dei, seier Grindevoll.

Få og unge
Nore Neset hadde for få spelarar til å melda småjentelaget på i ellevarfotball, også då dei sette saman laget av spelarar frå fire ulike årstrinn.

- Vi har éi som er fødd i 1996, to i 1997 og resten i 1998 og 1999, så vi har spelt sjuarfotball i 97-klassen.

Neste år får norenesingane Øyglimt-jenter med på laget så då blir det spel på full bane.