Noregs råaste til Halhjem
Switch skatepark opnar laurdag med eit forrykande show kor to av Noregs beste streetskatarar kjem.
Eit lite år ettar at dei starta prosjektet med å etablera skatepark på Halhjem opnar laurdag Switch skatepark banen offisielt.
- Den har allereie vore i bruk, men vi må ha ei skikkeleg markering for å takka alle dei som har hjelpt oss i mål, seier primus motor Bjørn Madsen.
Som å få Justin Bieber
Seint torsdag kveld fekk han stadfestinga på at to av Noregs beste streetskatarar tar turen til Halhjem for å delta på opninga.
- Vi har lenge jobba og drøymt om å få Michael Sommer og Fredrik Nærland til å koma for å opna parken.
- No kjem dei saman med Session Team Bergen som kjem til å showa og skriva autografar.
- Snakkar vi musikk er det omtrent som å få Vinnie, Kurt Nilsen og Justin Bieber til Søre Neset for å halda konsert, seier ein entusiastisk Madsen.
Michael Sommer starta skatinga då han var 10 år. No er han blitt proff skateboardar, og er i skatemiljøet kjend for sine særdeles bra 360-flips. Michael har deltatt i tre norske skatefilmar: Delta Charlie (2007) og Delta Charlie 2 (2009) og Delta Charie 3 (2010). Han medverkar òg i skatefilmen Monsson. Michael Sommer har ein 2. plass i Lucia Classics 2010 og vann NM Best trick 2009. Sommer er òg instruktør på ulike campar.
Fredrik Nærland står mellomanna bak, og er trenar på skatelinja ved Wang Toppidrett Stavanger saman med Stavanger Skateklubb. I 2007 sette han noregsrekord i lengdeollie (hopp med brett under beina) då han hoppa 5,10 meter.
Unge for unge
Opninga, som startar klokka 12, blir eit show for ungdom av ungdom.
- Os rockeklubb har teke på seg ansvaret for den tekniske produksjonen.
- På scena stiller Join Us og XN-TRIQ, eit hiphop kollektiv med base i Bergen med og av ungdommar frå 13-20 år. XN-TRIQ kombinerar dei fire hiphop-elementa breakdance, grafitti, dj-ing og rap, fortel Madsen.
I tillegg vil det bli moteshow med kler frå LOL, skateshow med skaterane frå Session, konkurransar og salsbodar.