Noregsmeister i blomsterdekorasjon

Bildeserie:

1 av 5

I helga arrangerte Norsk Blomsterhandlerforbund og hovudsponsoren Interflora Norge SA Noregsmeisterskap i blomsterdekorering på Scandic Ørnen i Bergen.

Nesttun Blomster stilte med to deltakarar som var kvalifisert gjennom distriktsfinalen, begge to med sterke band til Os. Sandra Kristine Jensen er busett på Søfteland, medan kollega Malin Balland er oppvaksen i Lysefjorden.

– Det var Malin som vann distriktsfinalen og eg blei nummer to. Sidan det var i Bergen NM blei arrangert fekk distriktet ein ekstra deltakar slik at vi begge var med, fortel Sandra Kristine Jensen.

Kake og juble

At ho kvalifiserte seg er nok arbeidsgjevaren godt nøgd med i dag. Sandra Kristine gjekk nemleg heile vegen og blei noregsmeistar.

– Det er klart det er stas. Sjefen stilte med kake då eg kom på jobb i dag. Dekorasjonane frå konkurransen er stilt ut i butikken og det har blitt mykje merksemd, mellomanna frå media, no på formiddagen. Men det er berre triveleg. Dessuten er det jo god PR, seier ho med smil i stemma.

Rein bonus

Den nybakte noregsmeisteren fortel at tittelen er ein rein bonus.

– Då eg fekk beskjed om at eg var i finalen var eg eigentleg nøgd. Målet var å komma dit, så alt anna ville vera ein rein bonus.

I A-finalen (for dei som har fagbrev i blomsterfaget) var det sju deltakarar. Det blei òg konkurrert i B-klassa for dei som er lærlingar eller ikkje har fagbrev.

– Finalen er eigentleg ein ganske stressande greie, det er nesten til å bli kvalm av. Vi får vita at vi er i finalen, så får vi 5-10 minutt på å førebu oss på oppgåven vi får utdelt før det berre er å setta i gang. Denne gongen gjekk det min veg, seier Jensen som har deltatt i seks NM tidlegare.

Komplisert bedømming

Om du trur at det berre handlar om kva som er pent eller ikkje når dommaren skal plukka ut meisteren må du nok tru om att.

– Det er fire hovudkategoriar dommarane dømmer etter. Det går på teknikk, idé, farge og komposisjon.

– Konkurransa består av tre oppgåver når du tek deg til finalen. Den første oppgåven fekk vi utdelt i sommar og har hatt god tid til å førebu oss på. Temaet i år av at vi skulle laga eit botanisk blomsterarbeid, forklarar Jensen som skapte ein fantasifugl i haustfarger i den første oppgåven.

– Oppgåve nummer to får vi fredagskvelden og skal laga laurdag morgon. I denne konkurransa fekk vi utdelt eit spesifikt fat, dei same blomstene og ei blokk med oasis til å stikke blomane i. Vi måtte bruka både fatet og oasisen i løysinga vår. Dette gjev dommarane ein moglegheit til å vurdera både faget og måten vi jobbar på.

Som regjerande noregsmeister er Sandra Kristine Jensen allereie kvalifisert til NM neste år.