Noregsmeistrar!

Då det gjaldt som mest klemte handballjentene til Os til og feia Flint av banen med 30-23-siger etter å ha leia 14-11 til pause.

Med sigeren kan jentene med rette kalla seg noregsmeistrar, ikkje berre uoffisielle (som dei kunne etter å ha vunne PW-cup tidlegare i vår), men no også etter å ha vunne nasjonalt sluttspel for J14.

- Det er heilt fantastisk. I finalen speler jentene sin beste kamp nokosinne, jublar trenar Aina Bjørke Kallestad.

Sto fram

Os kom best i gong og festa grepet om kampen. Flint visste ikkje heilt kva dei skulle gjera, men sette frimerke på Anna Bjørke Kallestad og Vilde Brattabø, som hadde vore toneangjevande då dei to laga møttest i den innleiande kampen (ein kamp Os vann 23-22).

Dette gav rom for fintesterke og fotrappe Julianne Hjelle. Ho greip sjansen og snurra rundt med Flint-forsvaret.

- Det var utruleg kjekt at Julianne greip sjansen, og at ho blei kåra som lagets beste spelar i finalen, smiler trenar Kallestad.

Dei første noregsmeistarane i handball frå Os er: Ragnhild Hernes Leonsen, Silja Lunde Espelid, Anna Bjørke Kallestad, Torill Sandven, Julianne Hjelle, Elise Aga, Marte Haugsdal, Silje Martine Årseth, Benedicte Froland Nesdal, Camilla Lyssand Haugland, Vilde Brattabø, Marie Haringstad og Ann Kristin Lyssand. Trenarar: Aina Bjørke Kallestad, Torbjørg Brattabø og Elisabeth Aga.

Suveren semifinale

Os kom treigt i gong i turneringa. På fredag måtte dei sjå seg slått av Tindlund 19-23 etter å ha fått heile sju to-minuttarar mot seg. Laurdagens innleiande kampar vann dei med minst mogleg margin då dei slo finalemotstandar Flint 23-22 og Storhamar 21-20.

I semifinalen står dei lokale jentene frå Fyllingen på motsatt banehalvdel. Dei to laga møttest seinast for ei veke sidan i regionsmeisterskapet. Då vann Os 21-18, men Fyllingen blei regionsmeistarar framfor Os på målforskjell.

Denne gongen viste Osjentene igjen at dei er regionens beste lag og knuste Fyllingen heile 26-15.

Semifinalens store spelar var Marte Haugsdal, som gong på gong braut gjennom Fyllingen-forsvaret.

Ei betre avslutting kunne ikkje dei talentfulle jentene frå Os fått. Neste oppgåve no blir å kvalifisera seg til den nasjonale Bring-serien til hausten.