Ny delegasjon til Moldova

Dei siste åra har Os vgs hatt sitt eige solidaritetsprosjekt. I staden for å bli med på Operasjons Dagsverk, der skular frå heile landet samlar inn penger til eit felles prosjekt, har elevane konsentrert seg om å samla inn pengar til organisasjonen Hjelp Moldova.

Les òg: (lenkje til arkivsak)

I tillegg til innsamlinga har elevar og tilsette ved skulen fått reisa til Moldova, det fattigaste landet i Europa.

Er med på å gjera ein forskjell

I fjor blei Os Gymnas med på prosjektet og i år har dei fått endå ein skule engasjert.

– Då Kristine Krokli (styremedlem i hjelp Moldova og tidlegare elev ved Os vgs) presenterte prosjektet for oss på Langhaugen så fekk vi lyst til å bli med, fortel Jon Folkestad Jarane frå Langhaugen vgs i Bergen.

Saman med medelev Sindre Haveland og elevinspektør Stian Howslett Thowsen hadde dei tysdag tatt turen til Os vgs for å bli med på informasjonsmøte om reisa til Moldova.

To elevar, saman med tilsette frå skulane, skal reisa ned for å få sjå korleis moldovarane har det og kva Hjelp Moldova har gjeve. Representantar frå alle dei tre skulane blir med på turen.

– Dette er eit prosjekt elevane kan få eit forhold til, og når medelevar kjem heim med bilde og forteljingar så ser vi at dei er med på å gjera ein forskjell, fortel Jarane.

På godt og vondt

Med på informasjonsmøtet var leiar for Hjelp Moldova, optikar og osing Hans Bjørn Bakketeig. Han er reiseleiar for følgjet og synest turane med elevane er kjekke både på godt og vondt.

– Eg vil ikkje visa dei det verste, men heller sjansane, kva dei kan endra til det betre, fortel Bakketeig.

Veka før haustferien reiser delegasjonen til Chisinau, Moldova og der vil dei blant anna får besøka Hjelp Moldova sitt synssenter, eit sjukehus organisasjonen har utrusta med utstyr, eit sjukehus for mor og barn og det pedagogiske universitetet Ion Creanga, som samarbeidar med skulane i Os.

Veldig spent

Tonje Stølsnes Faanes frå Os vgs er ei av dei som får oppleva Moldova og arbeidet til Hjelp Moldova på nært hald.

– Eg gler meg og er samtidig veldig spent, det er eit land eg ikkje veit så mykje om, fortel Faanes som ,går andre året på sal, service og tryggleik-linja.

Hans Bjørn Bakketeig trur dei reisande vil få nokre spanande dagar med mange nye inntrykk i Moldova.