Ny drivar på Kafé Ole B

Bildeserie:

1 av 6

Då Reidar Engelsen, som overtok som eigar av Kafé Ole B for rundt eit år sidan, knekte foten i vår, blei det litt haltande drift av kafeen på Buena. Men no har Frode Søviknes, som bur i nabolaget, steppa inn som ny eigar.

– Eg overtok driftsselskapet Oleanna AS 1. juli og har opsjon på kjøp av driftsbygningen, fortel Søviknes.

Alltid open

Etter å ha servert sambygdingar, båtfolk og gjestar på veg til Museet Lysøen i rundt ein månad har den nye drivaren fått auka tru på eigen investering.

– Vi byrja med fokus på mat og opningstider, utvida meny og faste, gode opningstider.

Tilbakemeldingane har vore gode. Det har også besøket vore.

– Vi kjem framleis til å ta imot bestillingar på bord, for eksempel julebord og blåturar, men vil prøva å unngå lukka lag. Lysefjordingar, osingar og tilreisande skal veta at dei kjem til opne dører og ope kjøkken kvar dag, frå formiddag til kveld.

To avdelingar i same fjord

Frå før har Søviknes, som har bakgrunn som stuert og kokk, ein Narvesen-kiosk på Flesland og tur- og restaurantselskapet Aboard Kystopplevelser. Med Aboard har han ein eksklusiv turbåt og flotte serveringslokale i første etasje i den store bustaden sin vis a vis Ole Bulls villa.

– Eg kan nok driva eit fint samspel mellom Aboard og Kafé Ole B, når det dukkar opp grupper som dette passar for, trur han.

Pub og LIVE-musikk

Puben i andre etasje har vore stengt store delar av det siste året. Delar av etasjen har dessutan vore leigd ut som kontor.

– No er leigetakar flytta ut og veggen inn til kontoret skal rivast. Vi skal også bygga opp igjen trappa frå altanen ned til sitjeplassane på brygga. Kor tid vi opnar puben igjen er ikkje bestemt enno, men den skal nok også brukast med tida.

Av og til har det vore levande musikk på Ole B, og dette er også noko Søviknes kjem til å halda fram med.

– Laurdag 21. august kjem De Musikalske Dvergene tilbake. Dvergane har vore her fleire gongar før, og har eit stort og godt publikum i og rundt Lysefjorden.

Over Fanafjellet kvar torsdag

Ute på brygga møtte vi tre menn med kvar sin tallerk med vaflar på.

– Tidlegare reiste vi til Bergen og drakk øl, men så fann vi ut at vi skulle starta eit betre liv, så no reiser vi frå Bergen og Fana til Lysefjorden for å eta vaflar og drikka kaffi i fin natur. Det gjer vi kvar torsdag, fortel Knut Cerk-Hanssen.

– Vi har no ikkje blitt nokre betre av den grunn, supplerer Odd Engelsen til munter respons frå kameraten Per Tefre.

– Kanskje blir vi verande heilt til raspeballane blir servert ein dag. Det er noko vi har diskutert i det siste, seier Knut.