Ny rekord på Joakim
Joakim Sælen var suveren under Ungdomsmeisterskapet med ny personleg og meisterskapsrekord på 2000 meter kappgang.
Ungdomsmeisterskapet (UM) i friidrett samla landets beste 15 - 19 åringar til kappestrid på Askøy i helga.
I kappgang for 18 og 19 åringar var det to osingar som gjorde det skarpast.
Kappgangtalentet Joakim Sælen frå Nore Neset knuste all motstand og gjekk dei 2000 metrane på sterke 8.08.59 noko som var personleg rekord og ny meisterskapsrekord.
Joakim går for TIF Viking. Nærmast til å tukta den raske norenesingen var Sindre Ølness frå Søfteland TIF. Ølness blei nummer to 1.32 bak Sælen med tida 9.40.50.
Fjerde plass på Målfrid
Målfrid Pettersen Lunde har skifta klubb frå Os Turn til Fana IL og stilte i UM på 800 meter.
Den 15 år gamle jenta frå Os kom i det sterkaste av dei to heata og løp seg inn til 4. plass med tida 2.24.55, vel fire sekund bak vinnaren Amalie Manshaus Sæten frå Kristiansand. Tida til Målfrid var vel tre sekund foran den raskaste i det andre heatet.