Ny rocke-rekord laurdag

Bildeserie:

1 av 14

I helga var årets Søfteland Rock N LOL, den siste av sitt slag, ettersom arrangørane Andreas og William Lindborg, har annonsert at dei ikkje vil arrangera fleire festivalar på Sanden på Søfteland etter denne.

Festivalen fekk ein rekordstart fredag med unormalt stort publikum allereie klokka 18.00. Men etter KingCalling på hovudscenen kom ikkje det store rennet med folk utover kvelden.

– Eg blei litt nervøs for resten av helga. Vi selte berre 950 billettar fredag, seier Andreas.

3000 på gratiskonsert

Men laurdag var vêret finare og responsen på Idol-Eirik og Real Ones på familiefestival på dagtid fantastisk.

I fjor var det rundt 1000 som fekk med seg Samsaya og Datarock på dagtid, i år kom heile 3000, noko som truleg gjer konserten til den største i Os nokosinne.

– Familiedagen er gratis, men vi selte enormt mykje i kiosken. Det måtte hentast påfyll av is på Joker og frå andre butikkar.

Til saman hadde Rock N LOL 4.500 (3.500 betalande) gjestar i fjor, som var ny rekord. I år hadde festivalen cirka 5.850 gjestar (men berre 2.850 betalande).

Samtidig blei det annonsert at gullkalven Eirik Søfteland ville, utanom programmet, gjera retur med helikopter frå Idol-konsert i Nesbyen laurdag ettermiddag, til Søfteland for å spela tre låtar i 22-tida på kvelden.

Rekord laurdag kveld: 1.800

I tillegg til braksuksessen på dagtid blei det sett ny publikumsrekord på kveldstid.

– Vi var heilt utselt for første gong, det var knallgøy, seier Andreas.

Divisjonen opna festen før Cockraoch Agenda frå Fusa gjekk på scenen i teltet.

Så kom Kristiansand-bandet Honningbarna, som for alvor samla store folkemengder framfor scenen, og som skapte enormt med liv.

Allsong og jubel

Krakow, som også spelte på den aller første Rock N LOL, heime i hagen til foreldra til Andreas og William i 2007, følgte opp i teltet før Lars Vaular overtok hovudscenen.

Det kokte på Sanden!

Publikum hadde så vidt kome til hektene, ikkje alle hadde fått med seg tilleggsinnslaget som skulle koma med Eirik, men Idol-stjerna brukte berre 10 sekund til å få publikum tilbae framfor scenekanten.

Det blei allsong på både Don't let the sun go down on me, Månemannen og Gonna go my way.

Gerilja, som også spelte på Søfteland for tre år sidan, kjørte på med "space-disco-rock" som siste band i teltet før Bigbang runda av for full plen framfor hovudscenen.

Midtsiden kjem tilbake med video frå festivalen.

Midtsiden samleside: Søfteland Rock N LOL