F.v.: Katrine Vaktdal, Kari Midtbø og Erle Bøe Lunde fann balansen under Jentefotballdag for ungdom. (Foto: Kjetil Vasby Bruarøy)

Ny vri på Jentefotballdagen

Om våren handlar det om rekruttering, i dag var det ungdomane som fekk ny inspirasjon.

image
image
image
image
image
image
image
image
image
image
image
Av: Kjetil Vasby Bruarøy

Os Fotball og Nore Neset il har hausta merksemd heilt til topps i NFF for ideen, gjennomføringa og resultatet av «Jentefotballdagen».

Første versjon, i 2013, samla 250 jenter frå 5 til 10 år. Året etter fekk dei plass til 260 deltakarar.

Våren 2018 blei Jentefotballdagen arrangert for sjette gong på rad, men våren 2019 blei det ingen arrangement.

– Det krev eit ganske stort apparat, og vi klarte rett og slett ikkje å stabla på plass eit stort nok dugnadsteam, seier Kine Lunde på vegne av seg sjølv og den andre primus motoren, Eirik André Hesthamar.

– Vi vurderte å køyra den til hausten i staden, men no lagde vi ein annan vri - ein mindre jentefotballdag, men for dei litt eldre.

85 jenter frå omtrent alle klubbane i Os deltok på Jentefotballdagen i dag, som var for 10- til 15-åringar.

– Vi tenkte det kunne vera greit med litt ekstra inspirasjon i denne alderen òg, og har fått med oss både spelarutviklar i Sandviken, Øyvind Nortveit, og assistenttrenar Thomas Lyngbø som intstruktørar. I tillegg bruker vi eigne ressursar, Håkon Straume, Kari Berge og spelarane Annika og Lotte.

– Flinke trenarar og god gruppe

Clara Vangsnes og Amalie Frekhaug frå Os J13 slår presise pasningar mens Midtsiden spør kva som er bra med denne dagen, sett vekk frå det fine haustvêret.

– Det er kjekt å trena så mange jenter saman, seier Clara.

– Eg var på mange av dei første jentefotballdagane, og synest det er kjekt å få instruksjon av så flinke trenarar, seier Amalie.

Nordtveit har gjort suksess på Kuventræ før, med opprykk med Os sitt A-lag i 2006, og seinare med damene til Sandviken. Med seg hadde han Thomas Lyngbø, som synest dei unge jentene viser både teknikk og entusiasme i sola.

– Dette er eit veldig fornuftig tiltak, og det er klart at vi stiller når samarbeidsklubbane våre, Os og Nore Neset, inviterer.

– Topplaga er viktige, men det betyr endå meir at det er mange jenter som speler fotball, og at dei held på så lenge som mogleg.

– Vi prøver å legga opp til ei økt som først og fremst er gøy. Teknikktrening og nye øvingar er ofte spennande, og noko jentene kan bruka også om dei går på banen to-tre venninner for litt eigentrening.

Runda av som publikum

Dagen starta til ungdomsvenleg klokkeslett, klokka 13.30 på nyleg tilbakestilt klokke. Etter ein time trening var det fruktpause og ein prat med trenarane. Då kom også trenaren til Os/Nore Neset sitt damelag, Stian Kvåle, og snakka om seniorfotball og dagens kamp.

Så var det nok ei økt på feltet, i hovudsak med spel, før jentegjengen fekk vera publikum på Os/Nore Neset mot Sotra.

Jenter 2009 var maskotar under innmarsj, 2008-årgangen var balljenter under kampen.

Det blei ein spennande kamp, der Sotra leia 0-2, men Os/Nore Neset utlikna (mål av Andrine Kvittingen og Agathe Lekven) og kampen blei stpande å vippa. Kampen enda med 2-3-tap, men resultatet i serieavsluttinga hadde ikkje noko å bety, Os/Nore Neset runda av på ein fin 5. plass (av 12 lag) i 3. divisjon, 12 poeng bak serievinnar Loddefjord og 10 poeng bak Fana på 2. plass. Sotra tok 3. plassen.

– Ungdomsåra går fort, det er positivt om ungdomane ser mykje fotball, og om jentene ser mange seniorkampar med damelaget. Det er ikkje lenge til dei er del av laget sjølv, seier Lyngbø.

 

Fleire saker