Nye klager på russen natt til onsdag
Politiet fekk tysdag kveld og natt til onsdag fleire meldingar om støy frå russ i Bjørnafjorden.
Støyande russ og eitt trafikkuhell har vore innslag i politiloggen det siste døgnet.
Trafikk
Like etter klokka 18.00 tysdag 9. juni fekk politiet melding om eit trafikkuhell mellom to bilar på Lepsøyvegen.
– Heldigvis ingen personskadar, berre materielle skadar, og ingen politisak, seier politioverbetjent Atle Birkeland.
Russ
Seinare på kvelden kom det nye klager på russ.
– Like før midnatt var det fleire russebussar på ein skuleplass i Bjørnafjorden. Det var mykje bråk og høg musikk.
Russen skal ifølge politet ha fått beskjed frå rektor om å flytte seg.
– Noko dei også gjorde etter kvart, seier Birkeland.
Klokka 03.00 fekk politiet ny melding om støy frå russ.
Russen hadde teke tilhald ved ein barnehage i Hagavik.
– Det kom berre éi melding, og det blei ikkje sett i verk aksjonar eller reaksjonar frå politiet denne gongen, seier Birkeland.