F.v.: Trond Hope, Cecilie Baggen, Kristin Bogan Larsen, Marius Bøe og Frank Baggen. (Foto: Kjetil Vasby Bruarøy)
F.v.: Trond Hope, Cecilie Baggen, Kristin Bogan Larsen, Marius Bøe og Frank Baggen. (Foto: Kjetil Vasby Bruarøy)

Nye oppdrag for Os Røde Kors

Skal køyra «korona-ambulanse» og hjelpa Rema 1000 med reinhaldet.

Kjetil Vasby Bruarøy
05. april 2020 - 11:05

Os Røde Kors har avlyst ei rekkje kurs grunna koronakrisa denne våren, og Røde Kors over heile landet kan nok venta seg ein rolegare påske i høgfjellet, når nesten ingen får bruka hyttene sine.

Men i Os og resten av Vestland har nye oppdrag kome på bordet.

– Vi har fått transportoppdrag av Helse Bergen, og skal køyra koronasmitta i «grøn ambulanse», fortel Marius Bøe.

Han har nyleg overtatt som leiar i Os Røde Kors hjelpekorps etter Atle Vågstøl, som har rykt opp til rolla som fungerande områdeleiar.

– Det betyr at mannskapen vår har vore på tilsvarande smittevernkurs som ambulansepersonellet til Helse Bergen. No får vi testa utvida kunnskap for ny samarbeidspartnar.

Hjelper Rema 1000 før påske

Laurdag kunne du møta fleire frå det lokale hjelpekorpset utanfor Rema 1000 Kuven stasjon. Dei vaska både handlekorger og hendene til kundar på veg inn i butikken, om dei ville det sjølv.

Rema 1000 har på regionsnivå inngått samarbeid og engasjert Røde Kors før påske.

Kvar vogn blir sprita før ny kunde tar den med seg. (Foto: KVB)
Kvar vogn blir sprita før ny kunde tar den med seg. (Foto: KVB)

– Dei hjelper oss med kontinuerleg vask av handlevogner og -korger, tilbyr ekstraservice til kundar og svarer på generelle spørsmål om smittevern. Det er ei glede å ha dei her, og det ser ut som om kundane både set pris på dette og føler seg tryggare, seier kjøpmann Trond Hope.

Røde Kors er tilbake både tysdag, onsdag og påskeaftan.

Dag og natt - men ikkje søndag

– Etter hamstringa dei første dagane var vi over på tilnærma normal handel. Det har stabilisert seg med færre kundebesøk, men samla sett auka omsetnad. Folk handlar sjeldnare, men fyller korga meir, seier kjøpmann Trond Hope.

Han er glad for å ha Røde Kors på plass før påske, når det normalt er ekstra travle dagar.

– I desse dagar er det ikkje omsetnaden vi bryr oss mest om. 

Lukasz sa ja til ein dusj frå Røde Kors før handleturen. (Foto: KVB)
Lukasz sa ja til ein dusj frå Røde Kors før handleturen. Spriten er laga av Bareksten, som nyleg vann sitt andre VM-gull for gin-en sin. (Foto: KVB)

Daglegvarebutikkane er blant få stadar folk samlast.

Søndags-Rema er stengt, og blir verande stengt. 1500 daglege besøk på 100 kvadratmeter er tal kjøpmannen føler blir for mykje, sjølv om dei er spreidde utover dagen, og du reduserer kor mange som får vera i butikken til ei kvar tid.

Det er dessutan fleire tiltak i butikk.

– Mange av tiltaka er ikkje synlege for kundar, frå rein og varsam vareplassering om natta, til desinfisering om morgonen før kundane kjem. Andre tiltak går gjennom dagen, med reinhald av handlekorger, dører på kjøleskap og andre flater - og avstandsmerke for å halda folk frå kvarandre i køen.

Desinfisering før opning laurdag morgon.
Desinfisering før opning laurdag morgon.

Ny ATV og ny vri på besøkstenesta 

Røde Kors stilte på Rema med ny ATV. Den første fekk dei av Fløysand Tak i 2017. Denne er selt vidare til eit anna hjelpekorps, og pengane er investert i ein større.

– Denne har drift på alle seks hjula. No vil vi sjå om vi får midlar til også å kunna setja belte på den, fortel Frank Baggen og Marius Bøe.

Ved sidan av utsette kurs og nye koronarelaterte oppdrag, har Os Røde Kors ein ny vri på ei teneste som var veksande før smitteverntiltaka sette inn.

Besøkstenesta tel over 40 frivillige, men no er det lite heimebesøk.

– Ved sidan av avlyste kurs har vi avlyst fleire fellesturar med denne gruppa. Men dei frivillige er flinke, og framleis aktive, men no frå avstand. I staden for å reisa på besøk, så ringer dei rundt for ein prat med dei som elles mottar denne tenesta, fortel Bøe.

Marius Bøe er ny leiar i Os Røde Kors. (Foto: Kjetil Vasby Bruarøy)
Marius Bøe er ny leiar i Os Røde Kors. (Foto: Kjetil Vasby Bruarøy)