Sindre Leikvoll Moberg (t.v.) og Thomas Ryland Olsen er i drift med nytt firma. (Foto: Kjetil Vasby Bruarøy)
Sindre Leikvoll Moberg (t.v.) og Thomas Ryland Olsen er i drift med nytt firma. (Foto: Kjetil Vasby Bruarøy)

Nystarta firma rett på helgeoppdrag

Bjørnafjorden Hage & Anlegg AS ser lyst på våren - trass koronakrisa.

Kjetil Vasby Bruarøy
26. mars 2020 - 21:07
  • Midtsiden startar utsending av gratis nyheitsbrev på epost - meld deg på her

Fredag har Sindre Leikvoll Moberg sin siste dag hos Vestafjell, laurdag reiser han ut i felten på første oppdrag med kompanjongen og barndomskameraten Thomas Ryland Olsen.

– Vi planla firmaet i vinter, at det skulle sto registrert same dag som skulane og barnehagane stengte for å hindra koronasmitte visste vi naturlegvis ikkje då, seier Thomas og ler.

– Men vi har greit med oppdrag å starta på, to større og eit lite vi må ta unna på laurdag. Så får vi håpa at folk på heimekontor strekk på beina i hagen og får lyst på litt hjelp.

Droppa offshorejobb for å køyra gravemaskin

Sindre byrja å jobba i Vestafjell då han for ti år sidan skulle søkja jobbar i Nordsjøen, men likte seg så godt som anleggsgartnar og maskinførar at han blei verande som kollega med faren Tryggve.

Thomas slutta offshore fordi det var så travelt og triveleg å grava.

– Først var vi ein gjeng som mista jobben, så var det oppsving i bransjen og tilbake. Men då sa eg meg opp etter éin dag på plattforma. Eg orka ikkje svara alle telefonane og epostane om graveoppdrag mens eg var ute. Flyteriggen låg til land, så eg fekk reisa heim på dagen.

– Greit å vera to

Sindre (som er bror til fotballproffen Vegard LeikvollMoberg), fortel at Thomas har masa på han over lengre tid om å starta firma saman.

– Eg tenkte det var trygt og greit å jobba for andre, men synest samtidig det høyrdes spennande ut å skapa sitt eige. Vi liker begge å jobba mykje, og då er det kjekkare om det er for å bygga opp sin eigen arbeidsplass.

Thomas har drive for seg sjølv i fleire år, og har leigd seg ein del ut til Tøsdal Maskinstasjon.

– Det er supert å jobba saman med Frank Tøsdal, og vi kjem nok til å samarbeida om prosjekt også i framtida. No ville eg starta noko litt større sjølv, og då er det greit å vera to.

Olsen har leigd maskinene og utstyret sitt inn til det nye firmaet, som no er i posisjon til ulike kategoriar oppdrag.

– Vi har brei erfaring og blir ikkje kresne, frå små til store grøne og grå oppdrag. Graving, drenering, natursteinsmuring og belegningsstein står naturlegvis på programmet, men vi tar òg små vaktmeisteroppdrag og hekklipping, seier Thomas, som i utgangspunktet er utdanna tømrar.