Irene Strønen har investert i seks komplette sett, inkludert spesialtilpassa liggeunderlag. (Foto: hengmedoss.no)
Irene Strønen har investert i seks komplette sett, inkludert spesialtilpassa liggeunderlag. (Foto: hengmedoss.no)

Nytt firma sender deg rett i hengekøya

Har du lyst å sova ute, men manglar utstyr eller friluftserfaring?

Kjetil Vasby Bruarøy
10. mai 2020 - 10:26
  • Midtsiden har starta utsending av gratis nyheitsbrev på epost - meld deg på her

Irene Strønen har utdanning innan marknadsføring og reiseliv, og har alltid jobba innan serviceyrke. No har ho flytta seg utandørs med ny idé.

– Eg har ikkje utstyr eller kompetanse til ekspedisjonar eller toppturar, men har lenge hatt lyst til å starta eit lågterskeltilbod som  vil gjera det enklare for folk å få seg ei natt ute. Helst i hengekøye, men vi har òg lavvo.

– Sjansen dukka  opp i fjor haust då Sparebanken Vest ønskte å gi midlar til nokon som ville laga eit hengekøyeprosjekt. Midlane blei overørte til Bjørnafjorden Næringsråd, og eg er takksam for at eg fekk starthjelp til dette prosjektet.

Irene Strønen er takksam for midlane næringsrådet delte ut frå Sparebanken Vest. (Foto: Kjetil Vasby Bruarøy)
God starthjelp: Irene Strønen er takksam for midlane næringsrådet delte ut frå Sparebanken Vest. (Foto: Kjetil Vasby Bruarøy)

Strønen vil leiga ut utstyr, og dessutan hjelpa med lokalisasjon og montering.

– Kundane mine kan koma rett til ferdig camp. Eg kan ordna med bålpanne, ved og eventuelle andre ting som er ønskeleg for ein fin kveld i det fri, fortel Irene.

Heng Med Oss har utstyret og nokre forslag til plassar, men kvelden og natta får du og reisefølgjet ditt i fred.

Du treng meir enn ei hengekøye

Dei heng der og freistar deg i butikken, små, fargerike posar med ein større pose oppi. Men ifølgje Strønen er det ikkje berre å kjøpa seg noko å henga i, og tru at du skal få ei god natt.

– Først og fremst skal du ligga godt, hengekøya må henga beint og stramt nok. Og så må du halda varmen gjennom natta, unngå kuldestråling frå skyfri himmel og skjerma deg for insekt.

Heng Med Oss har investert i gode hengekøyer med tak og myggnett, solide liggeunderlag spesialtilpassa for hengekøyer og soveposar med innertrekk som går i vaskemaskina mellom kvart utleige.

Strønen har hatt fleire netter i hengekøye sidan februar i år.

– Mi erfaring er at spesielt liggeunderlaget er viktig, det held ikkje alltid å bare ha noko under seg, det bør også gå opp på sidene av hengekøya.

– Det er noko eige å vakna utandørs, synest Irene, som frå februar i år har hatt fleire netter i hengekøye. (Foto: Heng Med Oss)
– Det er noko eige å vakna utandørs, synest Irene, som frå februar i år har hatt fleire netter i hengekøye. (Foto: Heng Med Oss)

For nykomarar, padlarar og erfarne turfolk

Heng Med Oss ser for seg at marknaden kan vera alt frå folk som ønskjer å testa det å sova i hengekøye før dei kjøper, venegjengar der nokon har utstyr, andre ikkje, og padlarar som kjem frå for eksempel Fana og vil ta ei natt i Ervikane eller  Smievågen, men har begrensa sjanse til å ta med utstyr om bord.

– Det kan godt henda at det òg er folk som er heilt utan erfaring frå friluftsliv, men har lyst å prøva. Det kan vera både innbyggarar i Bjørnafjorden, tilflyttarar eller innvandrarar, som ikkje har vore på telttur eller sove i hengekøye før, og er usikre på både utstyr og kva plassar som er godt eigna.

Heimesida er klar med informasjon, prisar og dei første lokalisasjonane. Denne veka kom også Facebook-sida «Heng Med Oss» på plass.

– Vi har seks komplette sett til no, nok til ein storfamilie eller ein grei venegjeng. No håper vi på ein god heimesommar der mange kosar seg ute og får oppleva det å vakna i skjergarden eller på ein fjelltopp, seier Irene Strønen.