Oddbjørn Aspenes, her då han tok bronse med Os i lag-NM på heimebane i allstyle i fjor. (Foto: Kjetil Vasby Bruarøy)
Oddbjørn Aspenes, her då han tok bronse med Os i lag-NM på heimebane i allstyle i fjor. (Foto: Kjetil Vasby Bruarøy)

Oddbjørn Aspenes blei europameister

– Det blei ein knalltøff finale, men eg gler meg endå meir over juniorlaget, med Armin frå Os, sitt fantastiske gull i dag, seier veteranen.

Kjetil Vasby Bruarøy
02. oktober 2016 - 15:50

Os Karateklubb starta Wado-EM på beste vis med to gull fredag.

Etter Armin Palislamovic og Benjamin Askvik Midtbø sine finalesigrar følgte Oddbjørn Aspenes i går opp med gull i veteranklassen.

– Heldt på å rota det vekk

Aspenes tok sølv i comebacket i fjor.

Les òg: Slagkraftig comeback

– Eg heldt på å rota det vekk i første kamp. Eg dominerte kampen, men sleit litt med å skåra poeng, fortel Oddbjørn på telefon frå Nederland.

I finalen blei det endå tøffare.

4 av 5 kåra osingen til vinnar

Finalen blei tøff med fleire nedtakingar og harde treffarar.

– Eg leia 6-4, men så klarte engelskmannen eg møtte å utlikna til 6-6. Det var same mann eg slo i semifinalen i fjor, ein erfaren og merittert kar, og han var tydeleg svolten på revansje.

Med 6-6 var det opp til dommarane å plukka ein vinnar. Aspenes fekk 4 av 5 flagg og kan no kalla seg europameister i Wado-karate.

Noreg vann gull med juniorlaget

Også juniorlaget til Noreg klatra frå sølv i fjor til gull i år.

– Dette er noko med det største som har skjedd her nede, etter mitt syn. Veteranklassen er ikkje så stor, eg gler meg endå meir over lag-gullet.

På det norske Wado-landslaget i junior er det tre utøvarar, ein frå Sarpsborg, ein frå Mo i Rana og Armin Palislamovic frå Os Karateklubb. Alle har Cato Bruarøy frå Os som øvste sensei i WIKF Norge.

– Junior lagkamp var ein svær klasse og finalemotstandarane var vertsnasjonen Nederland, som blant anna hadde slått sterke Portugal og Kypros på veg til finalen.

– Armin gjorde ein god kamp som han nok burde vunne, men som enda 5-5. Unge Julian frå Mo i Rana fekk den avgjerande kampen og tok ein imponerande siger, fortel Aspenes, ti minutt etter søndagens lagfinale.

 

Les meir om

Sport Kampsport