– Økonomien ser bra ut
Ombygginga av Os ungdomsskule. - Tilboda ser ut til å ligga innanfor budsjettramma, seier rådmann Knut Terje Rekve.
Rett før fellesferien gjekk fristen til å koma med tilbod på ombygginga av Os ungdomsskule ut. No har rådmannen og hans stab kikka på tilboda og trekk eit lettelsens sukk.
- Totalt sett ser det bra ut.
- I motsetning til utbygginga på Nore Neset har vi for ombygginga i sentrum vald å legga opp til delte entrepriser, noko som er mest praktisk i høve til ei rehabilitering/ombygging, fortel rådmann Knut Terje Rekve.
Budsjettramma for ombygginga av ungdomsskulen ligg på omlag 80 millionar kroner.
Skal kvalitetssikra tilboda
Framleis gjenstår det å kvalitetssikra dei innkomne tilboda før entreprenørane blir valde.
- Vi har berre hatt ein kjapp gjennomgang så langt, men totalt sett ser det bra ut.
- Nokre av entreprisane ligg litt over det vi rekna med, men andre ligg litt under.
- På grunn av ferieavvikling vil det nok fort gå tre veker på kvalitetssikringa. Vi må sikre oss at alt som skal vera med er det, forklarar rådmannen.
Oppstart utpå hausten
Prosjektavdelinga i kommunen har orientert leverandørane korleis tidsplanen ser ut og når dei kan forventa svar.
- Sidan det no går litt tid på kvalitetssikringa reknar eg ikkje med at sjølve arbeidene på skulen tek til før litt utpå hausten, avsluttar Knut Terje Rekve.