Kultur | 31. juli 2012

Oktoberfest på Oseana

Ølhall med Direksjonsmusikken, klubbstemning med Vidar Johnsen og konsert med Hellbillies.

Oktoberfest på Oseana
Hellbillies, Direksjonsmusikken og Vidar Johnsen er nokre av dei som deltek på Oktoberfest i Oseana (foto: Hellbillies.com/direksjonsmusikken.no/myspace.com - Vidar Johnsen)
Andris Hamretysdag 31. juli 2012 10:04

I går blei det kjend at Susanne Sundfør kjem til Oseana 26. september. I dag slepp arrangørane fleire namn frå haustens program.

- Det er berre å settje av 5. til 12. oktober. Då blir det skikkeleg oktoberfest, fortel kulturhusvert Janne Mari Hjelle.

Det heile startar med rusfritt ungdomsarrangement med Anja Elena Viken fredag 5. oktober.

- Ho har gjort lyn-karriere i musikk-Noreg og har opplevd høg rotasjon på P3 med singelen "Klæsser deg ned".

Anja Elena Viken kjem til å få følgje på scena av fleire artistar, men desse namna held Hjelle framleis tett til brystet.

Bierstübe med direksjonsmusikk

Allereie påfølgande laurdag blir det høg stemning i Oseanasalen då den "byggast om" til ekte tysk bierstübe.

- Her blir det langbord og -benkar, ølseidlar og høg stemning, lovar Hjelle.

- Alle som kjem i Lederhosen eller tilsvarande vil bli gjort ekstra stas på.

På scena kjem Direksjonsmusikken frå handelshøgskulen til å køyra show og sørgje for skikkeleg tysk oktoberfest-stemning.

- Stemninga på scena er eg ikkje tvil om kjem til å bli høg, så får publikum i salen berre sørgje for at ho blir like høg der ute, smilar kulturhusverten som allereie er i gang med å øve på jodlinga.

Klubbstemning med Vidar Johnsen

Tysdagen i Oktoberfestveka tek tidlegare Vamp-vokalist Vidar Johnsen med band over scena.

- Då har vi fått vaska Oseanasalen og rydda vekk langborda.

- I staden for tysk kneipe, satsar vi på ei klubbstemning med runde bord, men med minst like bra stemning.

Vidar Johnsen har, etter at han slutta i Vamp, hatt stor suksess som soloartist og i tospann med svenske Peter Nordgren.

Hellbillies tilbake på Os

Festen blir avrunda fredag 12. oktober med flatt gulv og dans til dei folkekjære artistane i Hellbillies.

- Eg har høyrt rykter om at Hellbillies spelte for 1 500 personar i eit telt på andre sida av vågen her sist dei var her, noko som eg håpar lovar godt også for billettsalet til konserten her, ler Hjelle, som ikkje legg skjul på kva som er draumen for veka er.

- Vi ynskjer oss fire fulle hus og knallgod stemning! Med ei slik veke bak seg slepp ein leita etter lykka i haustmørket, avsluttar Hjelle.

Spennande? Vil du ha ukas høgdepunkt i innboksen?

Les meir om

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.