Dagens startellevar for Norge U16 mot Island. Ole Martin Lekven Kolskogen nr to bak frå venstre. (Foto: Helge Bjørke, fotball.no)

Olis skåra i landslagsdebuten!

Ole Martin L. Kolskogen spelte heile kampen mot Island i dag, ein kamp som enda i straffekonk.

Av: Kjetil Vasby Bruarøy

Fredag reiste det norske G16-landslaget frå Norge til nordisk meisterskap på Island, søndag var første kamp.

• Les òg: – Det er ein grunn til at du er tatt ut

Ole Martin Lekven Kolskogen frå Os Fotball sat som ubrukt reserve då Norge imponerte og slo Polen 1-0 (mål av Runar Hauge (FK Bodø/Glimt).

I dag var kamp nummer to, denne med Ole Martin Kolskogen frå start som ein av fem debutantar mot Island.

– Ole Martin viste at han er trygg med ball, han våger både å gjera ting med ballen og å bruka rommet framfor seg. Også defensivt gjer han ein god jobb, seier landslagstrenar for U15-U17, Gunnar Halle.

1-1 etter full tid

Ole Martin er omskulert frå spiss til midtforsvar, og spelte heile kampen. Norge leia 1-0, men Island utlikna.

– Det er ein kamp som vi dominerer. Vi har ballen mest og skapte mest, det var 11-3 i målsjansar. Utlikninga kom på eit frispark frå 45 meter, der vår keeper er ute og bokser, men misser. Med høgare balltempo hadde vi vunne denne, seier Halle.

Etter full tid sto det 1-1 (norsk mål av Oscar Aga frå Stabæk). Kampen gjekk til straffekonk.

Nettkjenning på Kolskogen 

– Begge lag får eitt poeng, men i tilfelle vi står likt når turneringa er over, kan straffespark-konkurransen bli avgjerande for plassering.

Norge tok leiinga også i straffekonkurransen. Kolskogen tok fjerde straffe og gav Norge 4-5-leiing.

Men Island feila ikkje meir og vann straffekonken, som altså kanskje ikkje får noko å seia.

Neste kamp er mot Nord-Irland torsdag.

• Sjå fotball.no si side om U16-landslaget.

Fleire saker