Omvende Bjarne Brøndbo

Jonatan Brekke driv med freestyle fotballtriksing, og saman med kompisen Marius Digernes frå Bergen melde dei seg på det som i år er den tiande sesongen av Norske Talenter på TV2.

Etter å ha teke seg lett gjennom dei innleiande rundane, var det på fredag tid for å høyna det heile med direktesendt TV frå H3 Arena på Fornebu i Oslo.

Torsdag i førre veke kunne Jonatan fortelja at nervene var sånn nokolunde på plass.

– Prøvene gjekk bra, og det nye nummeret vårt sit ganske godt. Vi er ikkje så nervøse akkurat no, men i morgon kjem vi garantert til å kjenna på nervene, ja.

2 mot 50

Jonatan fortel i dag at nervene aldri fekk dominera verken oppkøyinga eller opptaka, og at det heile eigentleg berre var veldig kjekt.

I semifinalen konkurrerte Jonatan og Marius mot åtte andre innslag, og det vart FBUT, ei barne- og ungdomsteatergruppe frå Fredrikstad som til slutt kunne innkassera finalebilletten.

– Vi fekk rett og slett ikkje nok publikumsstemmer, og det hjalp nok litt at den teatergruppa bestod av 50 utøvarar. Då har du eit rimeleg stort stemmeapparat bak deg, seier Jonatan og flirar.

Noko skuffelse vil ikkje Jonatan vera med på.

– Nei, dette har berre vore ei gøy oppleving å vera med på.

Brøndbo måtte korrigera seg sjølv

Etter at Jonatan og Marius hadde levert eit trikseshow, som fleire gongar løyste ut spontan applaus undervegs, måtte ein av dommarane, DDE-frontmann Bjarne Brøndbo, innrømma at han tidlegare hadde teke feil om freestyle-fotball.

– Eg sa vel ein gong tidlegare at dette eigentleg er litt kjedeleg - det er det ikkje lenger.

Både dommarane Mona Berntsen og Mia Gundersen skamrosa gutane, og oppmoda dei til å satsa vidare. Ikkje minst fram mot neste års VM.

Her kan du sjå heile innslaget, med dommarreaksjonane. (TV2.no)

Skal trena meir

Jonatan fortel at det har blitt eitt og anna betalt trikseoppdrag, og ikkje minst fleire følgjarar på Instagram etter TV-hausten, men no er det meir trening som gjeld.

– Vi tek med oss erfaringa og opplevinga, men no skal det trenast meir.

– Målet er sjølvsagt å bli verdsmeister!

• Les òg: Med foten på rette staden