Omvising i nydøypt ferje

Bildeserie:

1 av 22

Onsdag førre veke var det ikkje mindre enn fem ferje-dåpar på Halhjem då Torgahatten Nord gav namn til ferjene som betener strekninga Halhjem-Sandvikvåg.

Etterkvart som ferjene kom til kai vart MF Flatøy, MF Færøy, MF Huftarøy, MF Samnøy og MF Lysøy døypte.

Alle ferjene har fått namn etter øyer i kommunane Tysnes, Fitjar, Austevoll, Fusa og Os.

Før dåp fekk Midtsiden koma om bord i MF Lysøy.

Klimavennlege gigantar

Besøket startar på toppen. Brua (styrehuset) er på storleik med ei god stove. Der sit kaptein Ragnar Remme og mannskapen høgt over sjøflata. Det heile liknar ein kommandosentral, truleg også i funksjon.

Her oppe får du verkeleg inntrykk av kor store dei nye ferjene til Torghatten Nord er.

For ein enkel skribent med båtførarlappen er ein båt som er 134 meter lang og meir enn 20 meter brei skremmande stor. Blant all teknologien finn vi òg kjende ting som kaffitraktar og eit gamaldags barometer og kompass.

Svele og kaffi

Ned ein myriade med trapper finn vi salong og kafeteria.

Sjølv om turen over Bjørnafjorden har blitt kortare og kortare med åra, er det framleis noko med å få seg ein kopp kaffi og ei svele når du reiser på Vestlandet. Det heile, eller ein middag om føler for det, kan du nyta i ein salong mens ungane er opptekne på leikerommet som sjølvsagt er teikna inn i dei nye ferjene.

Bildekk til 180

Torghatten Nord valde eitt-dekks løysing for dei nye ferjene sine. Dette for å sikra ein effektiv og sikker om bord- og ilandkøyring.

Vekke er tronge løysingar med hengje-dekk og den sure nedturen mange prøvde å vri seg unna; å bli vifta under dekk av mannskapen. Dekket, med plass til 180 bilar, liknar meir ein parkeringsplass utanfor eit middels stort kjøpesenter.

10.000 hestar under dekk

Omtrent ved vassflata, og ein ny tur ned fleire trapper, treff vi på maskinsjef, Stein Kjetil Seglem. Han er ansvarleg for dei tre Rolls Royce-motorane på til saman rundt 10.0000 hesterkrefter.

I tråd med krav stilt i anbodskonkurransen av Statens vegvesen, er dei fem ferjene klimavenlege, og blir drivne med en kombinasjon av gass (LNG) og batteri.

Dei fleste har nok fått med seg dei store gasstankane på kaien Halhjem - veslebrørne finn du i maskinrommet på ferjene.

Seglem fortel at sjølv om det meste er automatisert, er det framleis nok å halda styr på under dekk.

– Vi fer ikkje rundt med hand-oljepumpa lenger, men det er framleis mykje som skal stellast og vedlikehaldast for å driva ei ferje kvar dag året rundt.

Fin flyt

Både kaptein Remme og maskinsjef Seglem er glade for å ha lege bak seg den heller trøblete starten Torghatten Nord fekk på sambandet i vinter, men utover det vil dei ikkje seia så mykje om den perioden.

– No er vi bare glade for å vera i gong med alle fem ferjene slik planen var, seier Remme.

Fakta om ferjene:
Lengde: 134 meter
Passasjerer: 545
Kapasitet (PBE): 180 personbilar
Framdrift: Gass og batteri