Ope hus med lærdom og leik

Bildeserie:

1 av 21

«Kom inn her og sjå kor fint vi har laga det til!» fekk vi høyra meir enn éin gong i løpet av runden vi tok då Kysthospitalet i Hagavik førre helg hadde ope hus.

Med unntak av ein etasje med pasientar var heile huset ope, og engasjementet var på topp hos dei tilsette, som hadde rigga ulike utstillingar og førebudd fleire aktivitetar for gjestane.

– Nokre av oss som er her i dag er på jobb, andre har stilt opp på dugnad. Målet er at gjestane ikkje berre skal få sjå, men at dei skal få læra litt og prøva litt mens dei er her, seier Turid Rognsvåg, fysioterapeut og ansvarleg for arrangementet.

I auditoriet var det historisk utstilling, bilde- og filmframsyning, i fysioterapiavdelinga kunne du testa både balansen din og kunnskap om kropp og latin.

På laboratoriet fekk gjestane måla blodsukker og blodtrykk, om dei ville, på røntgenavdelinga fekk du styra kamera og ta bilde av eit utstilt skjelett.

Publikum fekk òg koma inn i det «helligaste» rommet, ei av operasjonsstovene. Denne var innreidd med «pasient» og hadde instrumenta utstilte. Ein bor frå eit tannlegekontor kan nok ikkje måla seg i kva inntrykk dette verktøyet skapte.

Mange fag - éin gjeng

Sjukehussjef Kari Indrekvam sto som del av velkomstkomiteen då Midtsiden kom inn døra.

– Dette blir siste del av markeringa av 125-årsjubileet vårt. No har vi vist oss litt i bygda, på 17. mai og Osdagane, og hatt seminar og festmiddag. Det har vore eit veldig fint jubileumsår, no ser vi fram til å ta imot dei som våger seg ut etter ruskevêret.

• Sjå video og bildeserie frå seminaret i Oseana

Kysthospitalet har 204 tilsette. På spørsmål om kor mange det er i ulike roller, svarer Indrekvam at det ikkje er noko ho sjølv er opptatt av.

– Vi har mange fag, og alle oppgåver er viktige, frå reinhald og mat til pleie, behandling og omsorg. Vi jobbar saman som éin gjeng.

10.000 pasientar - 28 senger

Kysthospitalet har kapasitet til 28 overnattande pasientar, men det varierer noko gjennom veka.

– Det blir gjennomført 8-10 operasjonar per dag, fortel Indrekvam.

Frå måndag blir sjukehuset fylt opp. Onsdag er det nokre som reiser heim, mens nye kjem inn, og gjennom helga er det noko rolegare på huset.

I tillegg kjem konsultasjonar av ulik art, og pasientar som er innom på laboratoriet, CT eller røntgen. I alt blir det gjennomført rundt 10.000 konsultasjonar i året.

Tidlegare og komande oppgraderingar

Kysthospitalet fekk to nye operasjonsstover i 2008, i 2016 blei ei avdeling oppgradert.

– Er det ønskje om, eller plan om, fleire større oppgraderinger i nær framtid?

– Neste avdeling som skal pussast opp er oppvakingsavdelinga. Vi skal òg utvida, den eine fløyen skal bli lengre i alle etasjar. Det er ei større sak.

– Kor tid det blir er ikkje bestemt, men det ligg i planane, fortel Kari, før ho tar Midtsiden med frå øvste etasje og nedover.