Opna julehage i Sørstrøno

Video: Sjå stemningsrapport frå julehagetenninga i Sørstrøno. Musikk frå Nornekoret sin konsert i Os kyrkje i går, solist Katrine Askvik.

Dei siste åra har mange gått frå å henga lys på ein busk til å dekorera heile bustaden med lyslenker. 

På Gåssand har Randi i årevis fylt huset med fleire hundre nissar, i Halhjemsmarka lager dei julegate med utekino.

Hos ekteparet Mona og Christian Holko er hus og flaggstang dekorert med lys, men det er i hovudsak hagen deira som skil seg ut.

Stadig fleire effektar

– Det starta då eg skulle laga firmafest i hagen ein sommar, og byrja å kjøpa inn litt pynt og lys. I fjor kjøpte eg nokre oppblåsbare julefigurar med lys, i år blei det påfyll, fortel Christian.

Søndag ettermiddag var naboar inviterte på peparkaker, gløgg og tenning av «julehagen» - rundt 40 unge og vaksne dukka opp.

Utan å snubla i ein einaste bardun, blei det leik og dans mellom nissar og snømann på plenen. Ein liten høgttalar hengande på ein kleshengar, under ein paraply, skapte stemning.

– Eg skal sjå om eg finn ein høgttalar for båt, ein som kan stå ute og spela musikk kontinuerleg, seier LED-ministeren i Sørstrøno. 

Han har ikkje bakgrunn innan elektronikk, men jobbar hos Askeladden-forhandlaren Båtens Beste.

6 meter høg snømann

Etter nedtelling blei lysa rundt inngangspartiet tente, men det var lydane borte på plenen som fekk merksemd. Fire vifter jobba hardt nokre minutt, så byrja julehagen å ta form.

Ein juleportal med ein nisse som går opp og ned av eit juletre, ein nisse på traktor og ein annan på eit fly. I tillegg står to projektorar og lyser mot kvar sin gavl, den eine med julefigurar, den andre med nordlys.

– Eg hadde ein 4 meter høg snømann i fjor, men den blei øydelagd. Sidan eg såg Taule i Hagavik hadde ein nisse på 6 meter i fjor, kunne ikkje eg kjøpa ein mindre snømann, seier Christian og ler.

Verken investering eller drift går altfor hardt utover julebudsjettet, påstår han.

– Det kostar rundt ein tusenlapp per figur, litt meir for snømannen. Så sant det ikkje kjem kraftig vind, vil figurane stå oppe døgnet rundt fram til jula er over. Verken viftene eller LED-lysa trekk særleg mykje straum. Kjem det ein storm så tar det berre nokre minutt å sleppa lufta ut.

Bustaden og julehagen ligg langs vegen i Sørstrøno, nær den første busshaldeplassen du kjem til.

– Sørstrøno ligg jo litt for seg sjølv, men det var nokre bilar som køyrde sakte forbi i fjor. Det er berre kjekt om mange har glede av desse figurane, seier Christian.