Geir Bjørkeli frå Os har vore sjef for kanadiske Corvus Energy i halvanna år. I dag opnar han ein robotisert fabrikk på Midtun med 50 nye arbeidsplassar. (Foto: Kjetil Vasby Bruarøy)

Opnar maritim batterifabrikk på Midtun

Geir Bjørkeli tar Corvus Energy til nytt nivå, med fleire osingar på laget.

image
image
image
image
image
image
image
image
image
Av: Kjetil Vasby Bruarøy

I desember 2017 blei det kjent at Geir Bjørkeli skulle overta som ny administrerande direktør for Corvus Energy.

– Dei trengte ein erstattar for den førre sjefen, som er frå Canada, og såg etter ein nordmann, fortel Geir, som blei kontakta av ein hodejeger.

– Kvifor takka du ja til jobben?

– Eg liker å jobba med innovative løysingar, samtidig var dette ein sjanse til å vera med å bygga ny industri.

Lang og relevant bakgrunn

Bjørkeli er utdanna ved Bergen Ingeniørhøgskole (i dag del av Høgskolen i Bergen), innan maskin, og utvida seinare med «shipping, offshore & finance» i Singapore, mens han var i arbeid.

Han har jobba for Ulstein verft og hatt ulike stillingar for Rolls-Royce, først i Hagavik, seinare i Korea og Japan i til saman åtte år. Frå 2001 til 2009 jobba han som VP-sales for Nord-Øst Asia og som direktør for Rolls-Royce Marine Japan. 

Bjørkeli gjekk frå jobben som direktør for noregskontoret til nederlandske Huisman då han frå 2. februar 2018 starta i Corvus.

Rett etter at han starta har selskapet kjøpt Grenland Energy, som held til i Skien og utvikler og produserer lettvekts batteri til maritim industri, offshore og subsea. Dette for å styrkja kompetansenivået og komplettera portefølgja. I august blei det kjent at olje- og energigiganten Shell kjem inn på eigarsida.

Med ny base i Noreg

Då han byrja i det kanadiske selskapet omsette dei for 82 millionar kroner. I år skal dei nå 540 millionar kroner i omsetnad. Når Corvus Norway AS i dag opnar har selskapet 110 tilsette ved hovudkontoret i Vancouver i Canada, 50 i Bergen og 10 i Skien. 

– Vi var i Bergen frå før, med eit lite salskontor på Flesland. Dette blir naturlegvis noko anna.

– Kvifor etablera ein ny fabrikk i Bergen i staden for i eit lavkostland?

– Vi vurderte å vera nærmare leverandøren vår. Battericellene vi bruker i systema våre blir produserte i Kina. Men så spurde vi dei største kundane våre i Noreg og elles i Europa, og dei var tydelege på at vi burde vera nær marknaden og forbrukarane.

Fabrikken ligg i Sandbrekkevegen på Midtun og er på 6000 kvadratmeter. 50 nye arbeidsplassar skal drifta fabrikken. Det er nesten sant, berre 2 av 50 skal ha arbeidsdagen sin på golvet i fabrikken, saman med 13 robotar. Dei andre 48 sit på kontor i andre etasje for å driva med innovasjon og sal. 

Vurderte Os

Då det blei klart at ny fabrikk skulle byggast i Noreg, sjekka Corvus-direktøren forholda i si gamle heimbygd.

– Vi hadde ikkje tid til å bygga nytt, så det var Lidlbygget eg vurderte. Dessverre er det ikkje godt nok kollektivtilbod forbi Ådnadalen. Vi har fleire unge ingeniørar hos oss, nokre av dei bur nærmare Bergen sentrum, og nokre av dei er gjerne som bransjen dei jobbar i, opptatt av det grønne skiftet. Då er Midtun betre enn prærien til Terje (Ulvensletta og Ådnadalen i Os, der Terje Søviknes er ordførar).

Bjørkeli har tidlegare vore engasjert i lokalpolitikken i Os, for Høgre, og var medlem i første styre i Os Næringsråd. Han er ikkje imponert over næringsutviklinga i Os.

– Den skuffar meg, dessverre. Med mindre du er tømrar eller pizzabaker har det ikkje skjedd mykje næringsutvikling eller tilrettelegging for dette dei siste åra. Det kan sjå ut som om Lyseparken og det å venta på ny E39 har vore ei kvilepute for kommunen.  

Frå Os har det likevel vore god, kunnskapsbasert hjelp å få.

Kollegaer frå heimbygda

Om ikkje fabrikken i denne runden blei etablert i Os, har Bjørkeli nytte av fleire kompetente tilsette frå si tidlegare heimbygd.

– Vi har rundt eit dusin bjørnafjordingar her, halvparten frå Os og halvparten frå Fusa. 

Blant desse er Sonja Vernøy Hansen, som er sals- og marknadssjef, HR manager Karianne Pedersen Maltun, fabrikksjef Frank Espeland, COO Gisle Frydenlund og prosjektleiarane Raymond Lygre og Ove Løberg.

Under opninga i dag vil direktøren òg fortelja om ein stor, ny ordre.

– Vi produserer robuste batteripakker – vanligvis frå 1500-3000 kWh i storleik. Til samanlikning har dei største Tesla-ene eit batteri på 100 kWh. Det neste store vi skal laga er på 10.000 kWh. Dette vil bestå av 1.780 modular og vil ta 12 dagar å produsera, fortel Bjørkeli.

Fleire fartøy i vårt område er eller skal bli heilt eller delvis drifta på batteri frå Corvus, som ferjene mellom Halhjem og Sandvikvåg, den komande Kommandøren mellom Halhjem og Våge og båten som no skal byggast til Museet Lysøen.

Til dagens opning har Varde Film frå Os vore engasjert til videoproduksjon. Ein av filmane ser du her:

Fleire saker