Oppdaga innbrot i helga

I løpet av helga har politiet fått melding om innbrot i den nedlagde skulen i Hegglandsdalen.

– Ytterdør er brote opp og vindauge er knust, opplyser politioverbetjent Atle Birkeland.

Kommunen blei varsla.

Leiar for drift av eigedom i Bjørnafjorden kommune, Dag Søfteland, fortel at dei har hatt mannskap på staden.

– Fleire ruter er knust. Det ser også ut som om eit pulverapparat er tømt i eller utanfor skulebygget, seier Søfteland.

– Vi vil venta med å trakka inne i bygget til politiet har vore på staden, men har sikra dør og vindauge. Det er eit nesten tomt bygg, og ikkje lagra nokre verdiar i bygget.

Kommunen har fått nokre tips frå naboar, seinast i dag. Eitt av dei er frå ein turgåar som såg skadane laurdag formiddag.

– Det er uvisst kor tid dei var her, men det kan ha vore fredag.

Både kommunen og politiet er interessert i tips.

– Det har dessverre vore nokre raid med hærverk i det siste. I dag kom det også melding om hærverk på nye Fusa ungdomsskule, i tillegg har det vore hærverk på bygningen i friluftsområdet vi kjøpte i Sperrevika tidlegare i vår.