Opplevde VM-sirkuset i Brasil

Bildeserie:

1 av 8

Laurdag 14. juni var Torkel Hjertnes med på å spela 3-3 mot Vadmyra, etter å ha leia 3-0 til pause.

Søndag 15. juni gjekk turen til Brasil for å vera fotball-publikum, og for å få oppdatering frå lagkameratar som har tatt 9 poeng på dei siste 3 kampane før ferien, 6 av dei på bortebane.

– Eg svarte at eg gjerne kunne halda meg i Brasil når dei klarer seg så godt utan meg, ler Torkel, som søndag likevel kom heim igjen til Kuventræ og deltidsjobben på Osbadet.

– Det er utruleg kjekt at dei har gjort det så bra, med fire poeng frå toppen er det no veldig god motivasjon i laget.

– Men eg kunne godt vore ei stund til i Brasil, i alle fall ei veke, vi hadde ein fantastisk tur.

To innleiande og ein kvartfinale

Torkel reiste saman med kameratane Hans Kristian Sælen, Paal Kopperud og Kristoffer Tysseland.

Tore Kinden kom ned noko seinare, det gjorde også Kjartan Hagevik og Roar Hjelle.

Gjengen frå Os møtte også tidlegare lagkamerat, Frank Svendsen frå Fusa, som fleire gongar har hatt lengre opphald i Brasil.

– Vi kjøpte billettar via FIFA på førehand, til ordinær pris, men fekk ikkje velja kva kampar vi ville sjå. Men vi bad om å få kampar i Rio.

Det enda med tre kampar, ein billettpakke til 4000 kroner per person, der kvartfinalen var dyrast.

– Nokre skottar som vi var litt med der nede hadde kameratar som blei lagt i jern då dei prøvde å kjøpa billettar på svatebørs, av ein politimann i sivil. Vi hadde litt sug i magen då dei av oss som ikkje hadde kjøpt før avreise skulle skaffa seg billett, men det gjekk bra.

Osingane fekk med seg:
Uruguay - England, som enda 2-1 på Arena Corinthians i São Paulo 19. juni.
Ecuador - Frankrike, som enda 0-0 på Maracanã i Rio de Janeiro 25. juni.
Kvartfinalen mellom Frankrike og Tyskland, som Tyskland vann 1-0 i Rio 4. juli.

12 gradar og jakke-shopping

Starten på turen blei noko kaldare enn osingane hadde sett for seg.

– Vi starta i Sao Paulo og gjekk med t-skjorte til kamp. Vi tenkte ikkje over at det kunne litt kaldt, og så blei det 12 gradar og litt regn, så vi måtte kjøpa oss jakkar på veg til stadion.

– Men elles hadde vi fint vêr heile turen. Det var ein dag det regna i Rio, men då var vi på Paraty og på Ihla Grande og slappa av.

Viste kampar over alt

Sjølv om det var store opplevingar å sjå kampar på Arena Corinthians og Maracanã trengte du ikkje billett for å merka at det var VM i Brasil.

– Det var utruleg god stemning i byen og på stranda. Det var rigga opp FIFA Fan Fest, festivalområder med storskjerm og servering, og der var det mykje folk, spesielt då Brasil spelte.

– Men også på små, opne plassar inne i byen var det storskjermar og folkeliv. Vi var inne i byen og såg Brasil slå Chile i straffekonk.

På dagtid på strendene handla det også mykje om fotball.

– Vi spelte litt på stranda, og med ein gang vi tok fram ballen så kom det brassar bort og kasta seg med på spelet. Du får ikkje stå åleine med ein ball på Copacabana.

– Noko anna enn Premier League

Kameratgjengen frå Os har vore på fotballturar før. Torkel har også vore publikum i VM før, då han i 1998 var med pappa til Frankrike.

– VM skil seg ut på eit par ting. Publikum er meir blanda, det er ikkje dei motpolane som det for eksempel er i Premier League eller andre klubbseriar.

– Det er heller ikkje så mykje synging, sidan det er publikum frå så mange ulike land. Men det er mykje liv, og så er det jo bølgen, den får du berre i VM.

– Enkelte var meir opptatt av å følgja med på bølgen enn på kampen, fortel Torkel, som også er nøgd med logistikken i Brasil rundt kampane.

– Det var verre å koma seg opp og sjå Kristusstatuen (Cristo Redentor på fjelltoppen Corcovado i Rio de Janeiro).

– Vi brukte sikkert 7-8 timar på tur og kø før vi kom oss opp.

Sjølv om osingane var klare for meir VM då det i helga var tid for heimreise, er høgrebacken likevel nøgd med å vera i Os igjen.

– No er det litt jobbing og eigentrening og så er eg veldig klar for oppkjøring til haustsesongen, seier Torkel Hjertnes.