Opptur for ungdomen
Vêret blei ikkje så bra, men stemninga var likevel fin då 240 åttandeklassingar i dag deltok på Opptur med Os Turlag.
Bildeserie:
I dag blei Norges Turistforening (DNT) sin Opptur arrangert for 7. gong, med 30.000 norske 14-åringar på tur.
I ein rapport frå Helsedirektoratet kjem det fram at 15-åringar bruker 70 prosent av si vakne tid til stillesitjande "aktivitet". Årets Opptur er derfor viktigare enn nokon gong, meiner turistforeininga.
– At dagens ungdom sit meir stille enn pensjonistar bekymrer mange. Vi i DNT ønskjer å gjera noko med det. Alle landets 14-åringar er invitert med på ein topptur og av erfaring veit vi at for mange er dette deira første lille topp, seier Kristin Krohn Devold, generalsekretær i Den Norske Turistforening, til eigen nettside.
Første gong utan sol
Os Turlag arrangerte i dag Opptur for 5. gong i Os. Frå i fjor har alle dei tre ungdomsskulane deltatt med sine 8. klassingar.
– Vi blir rundt 240 elevar på tur i dag, seier Linda Ann Lohne til Midtsiden.
Elevane var samla på Kyrkjeflaten i Os sentrum for fellesstart klokka 9. Ordførar Terje Søviknes talte ned til start.
To timar over Borgafjellet
Turen gjekk frå Os til Nordmarka, gjennom skogen til Tøsdal, opp mot Møsnuken over til Borgafjellet og ned til Hjelle og Borgabygdo ned igjen til Os.
Det var inga tidtaking, men nokre postar med kunnskapskonkurranse på vegen.
Førstemann i mål var Konrad Oppedal. Han var nede på Os igjen etter rundt to timar. (Retta. Vi fekk først opplyst at det var Anders Havsgård som var først. Anders var rask, men Konrad raskast.)
– Ein fin tur
Lærarane fortalte om god gjennomføring og fin stemning i fjellveggen.
– Dei aller fleste kom seg til topps og ned igjen og eg trur ikkje det var nokre uhell, seier lærar Ørnulf Jacobsen.
– Og det var god stemning, trass i at det regna litt i starten, legg Ånon Valle til.
– Eg var blant dei som gjekk bakerst og det var fint å sjå at det ikkje låg noko boss igjen etter dei, heller, seier Helene Burø.
Mange fekk premie
Det blei trekt premiar både frå dei som hadde deltatt på kunnskapskonkurransen og på startnummer.
Desse fekk premie:
Steffen Hjelle Haugland vann kunnskapskonkurransen og fekk sovepose i premie. Iselin Haukeland og Steffen Askvik vann sitjeunderlag og hodelykt, Mina Fløysand vann termos, Ronja Haugland vann gåvekort på 500 kroner hos MX Sport og hovudpremien, ein flott tursekk frå Bergans, gjekk tl Atle Evensen.