Os 2 rykte ned - Bjørnar 2 berga plassen

Bildeserie:

1 av 11

Søndag spelte Os 2 sesongens siste seriekamp heime mot Bjørnar 2.

Os låg på 9. plass, rett over streken, før kampen mot botnlaget Bjørnar, som var eitt poeng bak. Tap på bortebane gjorde at eitt poeng ikkje var nok, Os trengte siger for ikkje å bli einaste lag som rykker ned frå avdelinga.

Ein svak førsteomgang gjorde det vanskeleg, men Os kjempa seg opp til 2 mål bak 7 minutt før slutt, og skapte ein spennande innspurt. Men heimelaget heldt ikkje roen i angrep etter den gode perioden, rusha på halvsjansar og landa fem mål bak.

Os 2 - Bjørnar 2 19-24 (9-16)
Os 2: Julie Hjertholm Lindborg, Ayleen Akyüz Hagen 5, Regine Steen 4, Camilla Halhjem 3, Mia Torp Nielsen 3, Vilde Lind Norvik 2, Marthe Høyerholt Færøvik 1, Silje-Marie Ognøy Hamre 1, Frida Sælen Lyssand.

Os starta med stolpeskot frå 7-metersmerket og miss på kontringssjanse og hamna to mål bak. Så gjekk gjestane frå 2-3-leiing til 3-7, 5-10 og 6-13.

– Å sleppa inn 24 mål er ikkje så gale, eg føler forsvaret sto godt, spesielt etter at vi la om til 5-1.

– Det vi taper på i dag er svake avsluttingar, i tillegg sto Bjørnar sin keeper veldig godt, synest avtroppande Os-trenar Gitte Torp.

Mista flyten i god andreomgang

Etter pause var kampen jamnare. Vertane tok innpå til 17-20 i 20. minuttt og 18-20 i 23. minutt.

Keeper Julie Hjertholm Lindborg sto stadig stødigare, og 7 av 8 utespelarar skåra.

Men så missa dei på kontringssjanse, stressa på ein halv kontringssjanse og gjestane auka leiinga igjen.

– Vi skulle ha roa litt ned då vi var tre og to mål bak, vi mista hodet litt, synest Gitte.

Dobbelt nedrykk

Os 2 klarte ikkje å henta inn igjen Bjørnar 2 og landa sist på tabellen etter å ha tatt 8 poeng på 18 kampar. Bjørnar 2 berga plassen med 9 poeng, mens Bergen og Askøy rykker opp til 3. divisjon, men Gneist på kvalifiseringsplass hakk i hel.

Dermed blir det to nedrykk på Os senior, førstelaget ned til 3. divisjon, anrelaget ned til 5. divisjon.

Torp og Budal hadde med seg nokre spelarar frå 2. divisjonslaget. Desse fungerte godt saman med andrelagsspelarane.

– Julie og fleire av dei som har trent mykje har hatt ei veldig god utvikling gjennom sesongen. Med betre oppmøte i sesongen som kjem kan nok dette laget kjempa seg opp igjen i 4. divisjon, trur Gitte.