Os Basketballklubb i vekst

Bildeserie:

1 av 8

Os Basketballklubb hadde lenge berre eit seniorlag påmeldt i serien. For fire-fem år sidan ville førre formann gje seg og klubben blei vurdert nedlagt. Men så kom fire foreldre til nokre yngre spelarar i klubben inn i styret.

– Vi meldte på eit aldersbestemt lag, U15, som består av både yngre spelarar og eit par eldre, som speler på dispensasjon, fortel formann Simon John Hamilton.

• Les òg: Fekk 15.000 kroner hos Os Lions (juli 2017)

Dei er no inne i sin tredje sesong, og den sportslege utviklinga har vore god.

– I starten tapte vi kampane med over 50 poeng, så byrja vi å spela jamnare kampar. I haust hadde vi tre sigrar på rad.

– Lett for nye å få stor framgang

Simon, som trener ungdomane saman Edgeras Pakalniskis, seier den viktigaste årsaka til den sportslege framgangen er at kvar enkelt spelar har blitt både teknisk betre og i fysisk betre form.

– Eg har inntrykk av at basketball er ein idrett du fort kan oppleva stor framgang i. Årsaka er kanskje at dei fleste startar nærmast på null. Det er ikkje som i USA, der basketmiljøet er stort, klimaet er varmare og ungdomen driv uorganisert leik med basketball i timesvis på fritida.

– Når dei då byrjar å trena systematisk kjem framgangen og resultata. Med fem spelarar per lag og mange skåringar per kamp blir sjølve spelet både spennande og intensivt, noko som gjer at spelarane fort blir i betre form.

Håper å få grunnlag for eit yngre lag

God rekruttering gjer at Os Basketballklubb no nærmar seg stor nok i medlemsmengd til å melda på eit endå yngre lag.

– Vi hadde rundt ti nye innom og prøvde seg på open dag i desember, tre-fire av desse blei medlem og er i gang.

Klubben har treningstid både i Oshallen og i gymsalane på Os barneskule og Os ungdomsskule. Måndag var det éin ny på trening, og då Midtsiden var innom tysdag kveld var det nok ein nykomar på plass.

– Eg speler litt med kameratane mine på fritida, og nokre av dei er medlem her. Dei trivst godt og inviterte meg med, fortel Amir Shirzad før han sprang inn på banen for å delta i fri leik før oppvarming, kasta ein trepoengar i korga og strekte ut armane for å ta imot jubelrop frå dei nye klubbkameratane.

Hamilton seier klubben har medlemmar frå 4. klassealder og opp til rundt 16-17 år.

– Til U15-laget har vi bra med spelarar, men plass til fleire. Får vi inn fleire yngre så kan vi melda på eit U13-lag i serien som startar til hausten. Det ville gjeve ein veldig god arena for dei yngste medlemmane våre.