– Os, ein friluftskommune!

Tysdag blei det kjend at Os kommune kjøper Raudlio/Stokkedalen frå Statsskog SF, noko som fekk både formannskapet og Os Jakt og Fiskelag (Os JFF) til å jubla.

Fredag morgon troppa representantar frå foreninga opp på ordføraren sitt kontor for å overlevera ei blomsterhelsing som takk for innsatsen.

Med seg hadde dei òg Åge Landro i Bergen og Omland Friluftsråd (BOF).

– Eg er imponert over den samstemte haldninga i Os kommune og det engasjementet ordføraren har vist.

– I løpet av dei siste åra har de løfta fram Os til å bli ei skikkeleg friluftskommune. Eg kan ikkje sjå noko anna kommune i Noreg som er på same nivå.

– Hadde det vore ein friluftspris så ville eg foreslått Os kommune på dagen, smilte Landro.

Landro har følgd utviklinga i Os tett, heilt sidan Moldaneset/Smievågen blei sikra på slutten av 90-talet.

I mai i fjor blei Ervikane og Oksebåsen redda for ålmenta.

Ope for alle

Os JFF, som forvaltar jaktrettane i Raudlio/Stokkedalen, er ikkje mindre entusiastiske.

– Vi har heile tida kjempa for å halda på dei områda vi har i dag.

– At kommunen no sikrar dette området gjev oss ei trygging på lang sikt, sa leiar i Os JFF, Tommy Grindeland.

– Laget har alltid vore ope for alle. Ein må ikkje vera medlem i foreninga for å få jakta på dei områda vi rår over.

– No er både storvilt- og småviltjakta sikra i overskueleg framtid.

– Eg håper dette kan vera med på å sikra at enno fleire unge får augene opp for friluftsliv og jakt, supplerte nestleiar og leiar i jaktgruppa, Gerda Sørheim Bøe.