Konferansier Davy Wathne og dagleg leiar Endre Brenne gratulerer Ole-Vidar Skaathun med tilslaget i auksjonen. (Foto: Kjetil Vasby Bruarøy)
Konferansier Davy Wathne og dagleg leiar Endre Brenne gratulerer Ole-Vidar Skaathun med tilslaget i auksjonen. (Foto: Kjetil Vasby Bruarøy)

Os Fotball 100 år - ein verdig galla i Oseana

Delte ut prisar - håva inn over ein halv million i pengegåver.

Kjetil Vasby Bruarøy
07. desember 2019 - 11:37

I 2005 markerte Os Turnforening 100-årsjubileet sitt. Fotball blei det ikkje før i 1919, og i starten som eigen klubb, Os Fotballklubb og Idrettslag. Kampane blei spelte på Vaksinen på Ulven. Først då Os Turnforening i 1934 planla idrettsanlegg på Kuventræ kom fotballen inn i Os Turn.

Fredag kveld blei 100-årsjubileet markert av 212 medlemmar og tidlegare medlemmar, frå 15 til 86 år gamle.

Eldstemann John Lepsøy blei intervjua på scenen av konferansier Davy Wathne. John var vestlandsmeister på skøyter og i 10-kamp, tok NM-bronse i spyd og kule og spelte 400 A-kampar for Os. Les portrettintervju med John då han fylte 80 år. Sist han spelte er berre to år sidan. I 2017 slengte han seg og redda eit skot av Hassan El Fakiri, som ville gått i vinkelen viss ikkje det blei redda, i kamp mellom kjendislaget og gatelaget.

Sjå video av Davy Wathne sitt intervju med John Lepsøy, og seinare på kvelden med Frode Steffensen og Bjørn Valle.

Ei rekkje prisar blei delte ut.

Årets toppskårar: Vy Mai Nguyen og Roger Blokhus Ekeland.
Årets mest framgangsrike: Tuva Søreide Solberg og Anders Hjelle Havsgård.
Årets spelar: Thale Strønen Skeie og Marius Haugland Mikkelsen.

Det blei delt ut pris til årets sponsorar; Sport Norge (Jan Frode Skeie) og Magnorvinduet (Ole-Vidar Skaathun). Då Torkel Hjertnes skulle dela ut pris til årets samarbeidspartnar, gjekk det på rim; Egil Hodneland i Hodneland Bygginnredning støttar klubben økonomisk, på styrenivå og i praktisk gjennomføring. Ein overraska og rørt Egil, som trente damelaget i 1. divisjon tidleg på 80-talet, kom opp og tok imot prisen.

Rørt var òg ekteparet som fekk den gjevaste prisen for kvelden, æresprisen på 100-årsjubileet gjekk til Annette og Tore Kleppe.

Annette er kioskansvarleg, Tore har vore trenar i rundt 20 år. Paret flyttar bokstavleg talt inn på Kuventræ (med bubil) når det er arrangement.

Også handverkareldsjelene Karsten Røttingen og John Ole Johannessen fekk pris for sin frivillige innsats med bane og anlegg. Odd Løvset og Trond Gausemel fekk pris for Hordalandsfotball sin innsats med å dekka kampar på mange nivå i fylket.

Fekk 560.00 kroner i gåve

Ei eldre fotballtrøye sportsleg leiar og sponsor Jan Frode Skeie fann i skapet sitt var signert av gamle Os-spelarar.

Auksjonen starta på 2000 kroner, men fjorårets auksjonsvinnar og hovudsponsor Ole-Vidar Skaathun og Magnorvinduet sendte den raskt opp i 50.000 kroner. Ståle Daae Børnes og Bergen Marinesenter auka til 100.000, så bar det til 150.00 og 151.000 før Skaathun rykte frå og fekk trøya for 200.000 kroner.

– H-Tre-logoen til bestefaren min betyr noko for meg. Det betyr òg mykje at Kjell Ove Lunde er her, eg hugsar framleis den første køyreturen eg hadde som ungdom og sidemannen til Kjell Ove ut for å levera vindauge, seier Ole-Vidar.

Kjell Ove Lunde blei òg hylla frå scenen av Davy Wathne, som blei sportsjournalist (fekk fast jobb i BT i staden for lærarstudie på Voss) takka vera Os sitt opprykk i 1974. Kjell Ove blei kåra til turneringens beste spelar med gutelandslaget under ei firenasjonarsturnering i Finland. Fleire av dei som spelte mot han blei større stjerner, og i fleire høve seinare, blant anna VM i Mexico, spurde folk kvar det blei av den måljegeren frå Os.

Tilbake til pengegåvene.

Tidlegare på kvelden hadde Ole-Vidar annonsert at han gav 100.000 kroner i gåve til jubilanten, og det blei lese opp ei helsing frå Knut Jarle Aspenes, som gav 150.000 kroner. Ordførar Terje Søviknes deltok på festen og gav 10.000 kroner frå Os kommune.

Det kom òg videohelsingar frå ei rekkjer kjente fotballnamn, frå Frode Grodås, som tidlegare i år heldt keeperskule på Kuventræ, til Nils Johan Semb, Ingebrigt Steen Jensen, som minnast ein viktig opprykkssiger til OBOS for Stabæk over Os i 1993, med påfølgande dyr opprykksfest (omtalt i Budstikka) - og Kjetil Rekdal, som ikkje gløymer at han blei rundlurt av Tim Henrik Sperrevik i NM-kamp mot Os i 2004.

Då auksjonen var over var det framleis meir gjevarglede igjen.

– Eg bryr meg ikkje noko særleg om fotball, men eg liker samfunnsansvaret klubben tar, både med yngre og eldre, sa bodgjevar og båtseljar Ståle Daae Børnes. Han er sponsor frå før, i går bladde han opp 100.000 kroner som «trøst» til seg sjølv for at han ikkje vann auksjonen, i det som, så vidt Midtsiden kjenner til, var kveldens siste gåve til Os Fotball.

– For det første er eg veldig takksam for at så mange stiller opp når vi lager galla og jubileumsfest, for det andre er eg overvelda over alle dei rause gåvene, seier dagleg leiar Endre Brenne.

• Os Fotball hadde galla i Oseana også i 2018. Då var det særleg heltane frå 1970-talet som blei hylla.

Les meir om

Fotball Os herre