144 mål på 18 kampar: Isak Røen var toppskårar i avdelinga førre sesong. No er han utan lag. (Arkivfoto: Kjetil Vasby Bruarøy)

Os handball har trekt herrelaget frå serien

– Trist, synest toppskårar. – Vi må bygga opp laget på nytt, seier formann.

Av: Kjetil Vasby Bruarøy

Til helga startar handballserien i 3. divisjon region vest.

Både herrelaget og damelaget til Os skulle starta sesongen med heimekamp, men dei som hadde gledd seg til å sjå to kampar søndag må nøya seg med damelaget i ny divisjon mot NHHI på ettermiddagen.

Herrelaget skulle spelt mot Eid, men av serieoppsettet går det fram at laget er trekt frå serien.

– Det er dessverre for mange av seniorane som ikkje ville vera med vidare, seier formann i Os Handball, Ingerid Verpe Jacobsen.

Handballgruppa jobba i vår med å bryta ut av Os Turnforening, men prosessen blei avslutta etter fleire motsegn frå forbundet. Verpe Jacobsen tok over som formann etter Rebecca Lerch Dahl.

– No får vi bygga opp eit nytt, robust herrelag. Vi har ungdomslag i både G14, G15 og G16, og det gror godt frå 12-åringane og nedover i alder.

Første opphald på nesten 50 år

Os Turnforening har hatt herrelag samanhengande sidan starten på 1970-talet, ifølgje jubileumsboka til hovudlaget (2005).

Frå 2002-2003 til 2008-2009-sesongen spelte dei i 2. divisjon, ein divisjon dei òg var oppom etter nedrykk til 3. divisjon.

Laget leia òg serien i januar i år, og var nær 3. plass på tabellen ved sesongslutt i 3. divisjon i vår. Så og seia utan trening.

Toppskårar i avdelinga førre sesong, Isak Røen, sa dette om framtida etter sesongslutt i vår:

– Det er jo litt tilfeldig kven av dei vaksne som kan vera med frå sesong til sesong. Men så kjekt som vi har det no, så bør det vera sjanse for at vi har ein fin gjeng i drift frå hausten av. Eg tenkjer det hadde vore bra å halda seniorlaget i sving i minst to år til, då kjem det opp ein fin gjeng frå gutar 14.

– Overraskande og trist

Nyhenda om at laget var trekt kom brått og noko overraskande på Isak, som skåra heile 144 mål på 18 kampar førre sesong.

– Det blei lagt ut ei avstemming på Facebook-gruppa vår, der i kunne svara ja, kanskje eller nei på spørsmål om vi ville spela ein sesong til. Eg trykte «kanskje», for eg ville venta og sjå kven andre som var med, og kven vi fekk som trenar, fortel Isak.

Så høyrde han ikkje meir før laget blei trekt.

– Eg veit ikkje kor mange som sa nei, men vi spelarar som svara ja eller kanskje kunne jo prøvd å henta inn nok spelarar om vi visste at det var fare for at klubben måtte trekka laget.

– Eg har ikkje bestemt meg for om eg vil finna meg ein annan handballklubb å spela for. Foreløpig er det berre fotball med Os 3, seier Røen.

Fleire saker