Os har fått ny keeper

Bildeserie:

1 av 2

Etter 3,5 sesongar for Lysekloster, der han var med på både opprykket til 2. divisjon i 2015 og 9. plass og nedrykk til 3. divisjon året etter, flytta Chris Sunde Midtun (27) til Austlandet midt i 2017-sesongen.

Når han no skal tilbake til Vestlandet blir Os den nye klubben hans.

– Det var litt rart i starten, etter fleire år med lokaloppgjer, men no gler eg meg veldig, seier Chris til Midtsiden.

Har halde buret reint i Vestfold

Chris flytta austover for å vera med kjærasten mens ho fullførte fysioterpaistudiet.

– Det var meininga at vi skulle bli buande ei stund etter at ho no var ferdig, men no blir det til at vi flyttar vestover likevel, seier keeperen.

Han jobbar som tømrar og har fått jobb hos Byggmester Kjell Aarvik. No ser han etter hus i Os.

Mens han har budd i Tønsberg har han denne våren spelt for 4. divisjonsklubben Flint. Chris heldt buret reint i 5 av dei 10 første kampane i år, som alle enda med siger. Flint glapp i siste runde før ferien, no skal Midtun vera med på å bidra til at serieleiar Os rykker opp til 3. divisjon.

Øvredal har gitt seg

Sunde Midtun har vakse opp i Fana. Etter 1,5 sesong på seniorlaget tente han verneplikta si. Så var han i Bjarg før han fekk nesten fire gode år i Lysefjorden.

Han fortel at han kontakta Lysekloster då det var klart at han skulle til Vestlandet igjen, men at dei skal ha svart at dei allereie var greit bemanna mellom stengene. Så tok Os kontakt.

– Frode Moberg Øvredal gav seg ein månad før sommarferien, dermed ville vi ha inn meir konkurranse på keeperplass, seier hovudtrenar Tim Henrik Sperrevik.

– Tar pause

Øvredal fekk ifølgje fotball.no berre fire kampar (3 sigrar og 1 tap) på 1,5 sesong i Lysekloster. I vinter kom han tilbake på Os, men også i 4. divisjon blei det ein del kampar på benken.

– Eg vurderte å legga opp etter åra i Lysekloster, men gjekk tilbake til Os i håp om å få spela meir, seier Frode, som i 2014 spelte 28 kampar for Os sitt A-lag.

– Eg fekk inntrykk av at eg og Anders (Fossen Lunde) skulle spela omtrent like mykje denne sesongen, eg meiner vi begge er for gode til ikkje å spela i 4. divisjon. Men sånn blei det ikkje, eg har berre spelt éin seriekamp i tillegg til NM-kvalifisering og NM-runden mot Åsane.

Sperrevik seier at eventuelle løfte eller forventingar om delt speletid blei skapt før han overtok som hovudtrenar.

– Keeperplassen er vanskeleg, det er berre éin plass å dela ut. Dette er seniorfotball, og då meiner eg det einaste rette er at den vi i trenarapparatet meiner er best skikka speler til vedkomande eventuelt speler seg ut.

– Eg synest det er synd at Frode gir seg, han er berre knappe 23 år. Det er mange som har sete mykje meir på benken enn han. Eg har gjeve han beskjed om at han er velkomen tilbake ved seinare høve, om han vil.

Frode, som i ungdomsåra var på kretslaget både som utespelar og som keeper, seier han førebels ikkje er i dialog med andre klubbar, men at han har pause frå fotballen.

– Det byrjar vel å kribla etter ei stund. Kanskje det er comeback som utespelar som må til, seier Frode og ler.