Os Karateklubb med to jentelag i verdstoppen

Bildeserie:

1 av 7

Ved sidan av å hausta medaljar i regionale og nasjonale stemne for alle stilartar, deltar dei framste konkurranseutøvarane i Os Karateklubb i EM og VM i sin eigen stilart, Wado.

Sidan karate er OL-grein i 2020, for første gong, kan dei ikkje arrangera EM eller VM tett opptil, verdseliten i Wado-karate var likevel samla til WIKF Global Cup i London i helga.

Noreg stilte med nesten 25 utøvarar, 10 av dei frå Os Karateklubb. Alle dei 10 frå Os var med på å ta medalje, seks jenter var del av to jentelag som tok gull i lagkamp.

– Det er første gong Noreg tar gull i lagkamp for jenter, og måten dei gjorde det på var imponerande, seier hovudinstruktør for WIKF Norge, sensei Cato Bruarøy 7. dan.

Aurora avgjorde fem sekund før slutt

Kvart lag har fem utøvarar, inkludert to reserve. På kvart av dei to jentelaga var det 3 utøvarar frå Os.

Det eldste jentelaget til Noreg slo Danmark og Nederland i innleiande rundar, USA i semifinalen og Italia i finalen i juniorklassen. Laget besto av Kerstin Michaelsen og Dounia el Ghami frå Rana, som også vann gull individuel, saman med Carmen Bruarøy, Hedvig Østevold og Malene Askvik Midtbø frå Os.

Dei yngre i kadettklassen (Mariell Askvik Midtbø, Helene Bakke og Aurora Berge Fagerthun frå Os) gjekk finale mot vertsnasjonen England. Her var det suveren siger av Mariell i første kamp, og tap i den neste. Dermed kunne Noreg klara seg med uavgjort i siste kamp.

Aurora Berge Fagerthun fekk første poenget, men så skåra motstander først eitt poeng, så ein 3-poengar (spark mot hovudet). Fem sekund før slutt utlikna Aurora med rundspark og sikra uavgjort i kampen og gull til Noreg.

Viktig del av U14-laget var òg Alva frå Rana Karateklubb.

Individuelt: Sølv og tre bronsemedaljar

Fire andre utøvarar frå Os tok kvar sine medaljar.

Ida Lund Bakke fekk bronse i kvinner senior, Sondre Kvamsdal tok bronse i herrar junior og superveteranane Svein Erik Henne og Vidar Mjånes tok bronse i kamp og sølv i kata.

Vidar Mjånes var òg dommar på stemnet.

– Det var høgt nivå på kata, og Vidar leia etter dei første rundane. Også Svein Erik kom til finalen, 2 av 9 i finalen var frå Os, seier Cato Bruarøy nøgd.

• August i år: Svein Erik gjorde comeback etter 25 år - fekk svart belte

Noreg tok i alt 15 medaljar. Beste norske klubb var Rana, som tok fire individuelle gull.