Lokal | 18. okt. 2013

Os kjøpte 7 % av Os

Signerte kontrakt på Raudlia og Stokkedalen: – De får det billig, seier Nils Lygre frå Statskog. – Vi kan kopla området opp mot Bergen, seier Terje Søviknes.

Nils Lygre frå Statskog og ordførar i Os, Terje Søviknes, signerte i dag avtale om kjøp av Raudlia og Stokkedalen, som til saman utgjer 7 % av landarealet i Os. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøyfredag 18. okt. 2013 12:15

Representantar for både idrett, jakt, fiske, friluftsliv og skogdrift var i dag vitne til at ordførar Terje Søviknes (Frp) signerte kontrakt med Nils Lygre frå Statskog.

Os kommune kjøpte i dag gardsnummer 1, bruksnummer 1, Raudlia og Stokkedalen, til saman 10.204 dekar for 9,3 millionar kroner, 550.000 kroner under prisantyding.

Les òg: – Os, ein friluftskommune

– Vi lurte i starten på om vi kunne følgja same mal som for Ervikane og Oksebåsen, men dette er ei større og meir komplisert sak, sa ordførar Terje Søviknes då han tok imot fleire involverte partar til signeringsmøte på Oseana fredag.

På møtet var, i tillegg til Søviknes og Lygre; Øystein Åsland og Kjell Kvingedal frå Fylkesmannen, Britt Karen Spjeld, idrettssjef i Hordaland fylkeskommune, dagleg leiar i Bergen og Omland friluftsråd, Åge Landro, Bjarte Erstad frå Norges Jeger- og Fiskeforbund, Marius Wesenberg frå Bergen Jæger og Fiskeforening, Tommy Grindheim frå Os Jakt og Fiskelag og Jørgen Frønsdal og Erling Birkeland frå Bergen Skog og Træplantingsselskap.

– Men vi hadde eit godt møte i mai og fekk ein fin prosess fram mot bodrunden, som vi gjekk heilt til landbruksdepartementet for å hindra, og som heldigvis ikkje enda i ein voldsom bodkrig.

– Men om det hadde gått mot ein heftig bodrunde så ville vi vore førebudd, det var ei rimeleg raus fullmakt eg og rådmannen fekk til å sikra oss desse eigedomane, sa Søviknes, framleis utan å røpa rammene han hadde då han gav bod.

Får truleg støtte

Os kommune har søkt om støtte frå fylket på 2 millionar kroner til kjøpet.

Før møtet, tidlegare denne veka, kom innstillinga til fylkestingmøtet 29. oktober, som seier at Hordaland fylkeskommune vil gje 1 million.

Det var noko Søviknes i dag såg ut til å vera nøgd med.

I tillegg kan det koma statlege midlar som del av finansieringa.

7 % av Os

Raudlia og Stokkedalen, 10.200 dekar, er ikkje berre eit skog- og jaktterreng, det utgjer heile 7 % av det landfaste arealet i Os kommune.

– Så kan du jo ganga kjøpesummen opp og sjå kva heile Os er verdt, spøkte Nils Lygre.

Det var ein munter "fredags-tone" på møtet, og ingen reknar nok med at dei kan kjøpa heile kommunen for 133 millionar kroner.

– Statskog var ikkje heilt nøgd med prisen, det kan eg seia. Men vi er glade for at det var Os kommune som enda opp med å bli kjøpar.

– Det handlar ikkje berre om tur- og jaktterreng, det handlar om å sikra store område for framtida, om regionsutvikling.

– Ved å sikra dette området er det lettare å fø opp gode osingar også i åra som kjem, sa Åge Landro frå BOF.

Kan koplast til Bergen

Søviknes fortalde litt om framtidsplanane for området, som på kort sikt er å driva vidare som før, i samarbeid med jakt- og fiskeforeiningane i Os og Bergen, og med Bergen og Omland Friluftsråd.

– Det er veldig mange av våre nesten 1000 medlemmar som bruker Raudlia. Området er også viktig terreng for vår opplæringsjakt, seier Marius Wesenberg frå Bergen Jæger og Fiskeforening til Midtsiden.

Medan jegerane i Bergen har brukt Raudlia i nær 100 år har Os JFF halde seg i Stokkedalen siden 70-talet.

– Vi ser også på ei løysing for å kopla desse terrenga saman med Bergen, med områda i Haugsdalen og vidare mot Bontveit og Totland.

– Det skal ikkje så mykje til, og om vi i tillegg klarer å kopla Osmarka via Tøsdal til Stokkedalen, ein noko meir omfattande prosess, kan vi ein gong i framtida få turløyper frå Os sentrum til langt inn i Bergen kommune, sa Søviknes.

Også Bergen Skog og Træplantingsselskap, som drifter ein del skog i byfjella, er med i diskusjonane og var representert på møtet.

– Vi vil sjå om dei kan delta med å drifta skogen i Raudlia og Stokkedalen.

Dagleg leiar i selskapet, Jørgen Frønsdal, fortalte at han har presentert ideen for styret, og at dei liker ideen.

– Ingenting er klart

Etter signeringa la Lygre til at "ingenting er klart før alt er klart".

– No må Os kommune søka om konsesjon, at kjøpesummen blir akseptert, at ikkje den er for høg i forhold til driftsgrunnlaget.

– Kanskje de bør senda søknaden rett til fylket, før fylket vedtar å koma med tilskot, slik at dei ikkje blir ugild part og må senda søknaden til høgare nivå for avgjerd, lo Lygre.

– Eg kan no ta ein telefon til Sylvi, kom det tørt frå Søviknes, om partikollega og nybakt landbruksminister Listhaug.

Spennande? Vil du ha ukas høgdepunkt i innboksen?

Tilgang til alt innhald for berre 145 kr i månaden

Di støtte gir liv til lokalavisa vår. Vi set stor pris på om du hjelper oss å spreia nyheitene!

  • Tilgang til alt innhald
  • Under 37 kr/veka
  • Utan bindingstid
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.