Etter ein sommar med intensiv dugnadsjobbing er det i morgon opning av den nye motocrossbanen. (Foto: Kjetil Osablod Grønvigh)

Os MC & MX Klubb på oppløpssida

Det har ikkje mangla på utfordringar, men på laurdag kan Os Mc & Mx Klubb endeleg opna den nye banen sin i Kolskogen.

image
image
Av: Kjetil Osablod Grønvigh

«Veks seg inn i ny bane» skreiv Midtsiden i 2014.

Vegen mot ny bane har vore lang for Os MC og MX Klubb, men det har vore framdrift i rykk og napp. Våren 2016 kom den kommunale garantien, så har det gått slag i slag med planlegging, finansiering og bygging.

Den nye banen er nærmare 1000 meter lang. Kort i nasjonal samanheng, men over dobbelt så lang som den førre, som var 400 meter.

– No trur vi alt skal vera klart, seier Jane Espeland og Sindre Midtun frå den ambisiøse klubben.

Sjølv om regnet ausar ned, og vêrmeldingane spriker mellom Yr sitt opphaldsvêr og Storm, som spår regn, er det tydeleg at Espeland og Midtun ser fram til den offisielle opninga på laurdag.

– Dess meir søle, dess betre, meiner mange i motorsportmiljøet. Publikum må berre hugsa å kle seg godt, er oppmodinga deira.

Talar, utstilling og song

Jane Espeland tek Midtsiden gjennom eit tettpakka program ho er tydeleg stolt over:

– Speaker for dagen er Eivind Ødegaard, ei kjend stemme i motorsportmiljøet.

– Vi har celebre gjestar frå Norges Motorsportforbund. Frå Os kommune kjem både avtroppande ordførar Marie Bruarøy og påtroppande ordførar Terje Søviknes saman med idrettskontakt Tom Leonsen.

• Les òg: Ny crossbane tar form (april 2017)

– Det vert offisiell opning, helsingar, og noko eg tykkjer er særs viktig; nemleg å syngja Os-songen.

– Eg skal halda tale. Noko eg gruar meg til. Det vert utstillarar, mellom anna rallycrossbilar, radiostyrte bilar og motorsyklar.

Høglytte og eksplosive planar

Naturlegvis blir det òg  oppvisningskøyring på den nye banen. 

• Video: Brukte isen på Ulvenvatnet som bane (2013)

Men motorsyklane er ikkje dei einaste som skal laga lyd i Kolskogen i morgon.

– Os Rockeklubb stiller med både lyd og musikalsk underhaldning, skreddarsydd for dagen.

Som seg hør og bør på ein opningsfest, har arrangement ei overrasking på lur. Jane Espeland og Sindre Midtun vil ikkje røpa noko, men at det vert eksplosivt er det ikkje tvil om.

Fleire saker