F.v.: Næringskonsulent i Os kommune, Jon Sivert Rykkel, saman med gründerane Hana og Michelle, og sentrumssjef Jeanett i møte måndag. (Privat foto)

Os sentrum første pilot for prisvinnande app

I dag blir «Svippin» lansert. No kan du samla poeng på Osøyro som gir deg rabatt i butikkane.

Av: Kjetil Vasby Bruarøy

Frå i dag kan du få poeng for å visa deg i Os sentrum, eller på ein fjelltopp. 

Poenga kan du veksla inn i noko av reell verdi.

Prisvinnar frå Bergen fekk Os som prøvekanin

Hana Colakovic og Michelle Sæther frå Bergen står bak appen «Svippin», eit resultat av ei masteroppgåve dei leverte som studentar ved Høgskulen på Vestlandet. Dei to 25 år gamle damene vann innovasjonspris på skulen, fekk støtte av Innovasjon Norge og blei tildelt éin million kroner frå Norsk Forskingsråd. 

Så hamna dei i møte med sin første kunde, Os Sentrumsforening.

– To anbefalingar på to dagar

Leiar i Os Sentrumsforening, Jeanett Borgen Kallekleiv, seier det ikkje var slumptreff, men to tette og tydelege heiarop som førte ho i armane på dei to unge gründerane.

– To andre leigetakarar i gründerparken i Os, der eg har kontor, kom uavhengig av kvarandre bort og anbefalte meg «Svippin». 

– Dei hadde fått presentert appen på kvar sine samlingar, og meinte dette måtte passa perfekt for medlemmane i sentrumsforeininga og brukarane av Os sentrum.

Etter møte med Svippin-folka blei det medlemsmøte, der gründerane sjølv kom til Os for å presentera ideen og appen.

– Det var ikkje vanskeleg å få medlemmane med på dette.

Startar med det enkle

Hana starta med bachelor i økonomi og administrasjon, Michelle med bachelor i IT. Saman tok dei kvar sin tverrfaglege mastergrad, Hana i innovasjon og leiing, Michelle i innovasjon og entreprenørskap - kvar sitt utgangspunkt, men med same mål.

– Å få folk til å møta opp. Det var i utgangspunktet to bruksområde vi såg for oss, frammøte på skule og det å bruka sitt eige by- eller bygdesentrum, seier Hana.

– Vi visste at fråvær og fråfall er eit problem ved fleire skular, kvifor ikkje bruka gulrot framfor pisk? 

Men i første omgang la dei elevane på hylla og satsa på eit vaksent publikum.

– Vi veit at handelsstanden har hard konkurranse med netthandel, forklarer Michelle.

Med seg på laget har dei utviklaren Pål Vårdal Gjerde. 

– Vi har starta med det enkle, markør i kart som får folk til å møta opp. Men Svippin kan utvidast med fleire, morosame element i framtida.

Lanseringa i dag er på App Store, neste veke vil den òg kunna lastast ned på android.

– Vi ønskjer å visa folk kva som skjer og kvar det skjer. Mens dei opplevere bygda eller byen sin, tener dei poeng.

Møt opp - få poeng

Dei som lastar ned appen får poeng ved å stempla inn ulike stadar. Poenga kan brukast til, for eksempel, ein gratis kaffi eller ein viss rabatt hos ulike bedrifter. Alt blir styrt av kunden, som i første omgang er Os Sentrumsforening.

– Dei skal testa ein betaversjon av appen frå i dag til februar. Vi ønskjer tett dialog med både bedriftene og brukarane, for vidare utvikling av appen, seier Hana og Michelle.

Saman med Jeanett er dei opptatt av at appen ikkje berre skal handla om handel.

– Det kan godt henda at du må på Borgafjellet ein dag, for å få poeng. Folk har godt av frisk luft, dette handlar også om å koma seg ut, både i naturen og på kafé, eller i gatene eller på brygga for å møta folk, seier Jeanett.

Fleire saker