Sander Kvittingen kunne gratulera Frode Storebø (t.h.) med skåring både mot Smørås (bildet) og i dag, mot Fyllingsdalen. (Foto: Kjetil Vasby Bruarøy)

Os slo Fyllingsdalen

Erik Huseklepp skåra to, men Os snudde kampen og vann på Varden.

Av: Kjetil Vasby Bruarøy

Os spelte i dag sin tredje treningskamp denne vinteren. Etter 0-2 for Fana og 3-0 over Smørås sto bortekamp mot Fyllingsdalen for tur.

Fyllingsdalen tok 2. plass i 3. divisjon i fjor, bak Sotra og framfor Lysekloster, og har i vinter styrka stallen med comeback av Erik Huseklepp.

– Huseklepp skåra begge måla til vertane, fortel Os-kaptein Marius Mikkelsen.

Mikkelsen utlikna til 1-1, Mats Cato Moldskred gav Os leiinga med 2-1 før pause.

Fyllingsdalen utlikna tidleg i 2. omgang, men så gjorde Frode Storebø det same som han gjorde førre helg; skåra Os sitt tredje mål og blei matchvinnar.

Os hadde litt tynn tropp med seg, grunna skadar, og då Mikkelsen måtte av banen eit drygt kvarter før slutt, var det ingen å setja innpå.

Dei avslutta med ti mann, men leiinga sto seg kampen ut.

– Nok eit steg fram

– Samla sett synest eg at vi gjer ein veldig god kamp. Press-spelet vårt fungerer, spesielt i 1. omgang, og vi skapet ein del store sjansar, seier Mikkelsen.

Trenar Endre Brenne synest dagens prestasjon var nok eit steg fram.

– Spelarane får til det vi øver på og er lojale mot planen vi har laga.

Kampen var nysignert spiss Roger Ekeland sin første for Os.

– Roger klarte seg bra, jobba hardt, hadde ein sjanse som fint kunne blitt mål og viser at han kan blei ein viktig spelar for oss i år.

Fyllingsdalen - Os 2-3 (1-2)
Målskårarar: Marius Mikkelsen, Mats Cato Moldskred og Frode Storebø
Os: Chris Sunde Midtun - Anders Havsgård, Alexander Dale, Petter Austevoll, Torgeir Lunde - Rune Mo, Marius Mikkelsen, Steffen Kvamsdal - Mats Cato Moldskred, Fabian Bødtker og Roger Ekeland.
Innbytarar med speletid: Sander Kvittingen og Frode Storebø kom innpå frå starten på 2. omgang, Trym Hjørnevik blei byta inn i løpet av omgangen.

Fleire saker