F.v.: Christer, Christiane Gjertsen, Kristoffer, Arnulf, Sondre, Frida Bjørø og Josefine Gjertsen på plass i Ungarn. (Privat foto)

Os stiller sterkt i VM

3 av 4 frå Noreg er frå Os Aeroklubb, på plass i Ungarn etter ein lang køyretur.

image
image
Av: Kjetil Vasby Bruarøy

Søndag startar Junior World Gliding Championship 2019 i byen Szeged, heilt sør i Ungarn. Fire norske deltakarar skal gli i seglfly i 5 til 15 dagar.

– Å fly seglfly er vêravhengig. Vi er i lufta alle dagar det er forhold til å fly, noko som altså bør bli 5 til 15 dagar før meisterskapen er over, forklarer Kristoffer Samuelsen.

I 2012 var han Noregs første 18-åring som fekk utdanna seg til flyinstruktør. I 2013 debuterte han i junior-VM.

– Det var òg sist eg var i VM, og sist Os Aeroklubb var representert i junior-VM. Sidan seglflygarar ofte ikkje er på vengene før dei er 17-18 år, er vi junior til vi er 25 år. Dette er med andre ord mitt siste VM som junior.

I VM blei det 30. plass av 38 deltakarar, ein debut han var nøgd med. På merittlista står òg NM-gull og bronse i junior, NM-sølv i senior og 5. plass i nordisk meisterskap.

Fire pilotar frå Noreg

Samuelsen har køyrd frå Os til Ungarn saman med to sambygdingar, Christer Ervik Mjøs (23) og Sondre Bjørø (22).

Frå Købehavn har dei køyrd saman med trønderen Arnulf Snekvik (25) frå Nordfjordeid Aeroklubb.

Søndag kom kortesjen med det norske juniorlandslaget på plass, i kvar sin bil med fly på slep.

I trening

– Det blei ein lang tur, men vi har med oss godt bakkemannskap, seier Christer.

Han er VM-debutant og har tidlegare tatt sølv og bronse i junior-NM.

– Vi fekk ein uoffisiell treningstur tidlegare i veka, onsdag var det offisiell trening.

Treninga tel ikkje i konkurransen, men offisiell trening blir loggført, så deltakarane kan studera kor gode konkurentane er.

– Du kan delta i akrobatikk eller strekk-flyging (distanse-flyging). Vi får ei rute som vi skal fly raskast mogleg.

Kva konkurransedag frå søndag 28. juli til laurdag10. august kan det plukkast poeng. Så sant forholda er gode nok til at dei kan fly.

I fars gode fotspor 

Arnulf frå Trøndelag har deltatt i VM to gongar før, men seier det ikkje blei noko bra resultat. Men han har tidlegare tatt gull i junior-NM, sølv i senior-NM og blitt nordisk juniormeister.

Sondre Bjørø (22) frå Os er yngstemann i laget frå Noreg. Han deltar i VM for første gong.

– Eg har deltatt i NM og nordisk junior dei siste fire åra. Beste resultat er tre NM-sølv, fortel Sondre, spent før VM-debuten.

Sondre er son til Jo Inge Bjørø, som har ei lang rekkje med NM-titlar. 

– Eg er veldig glad for at så mange frå Noreg kunne stilla, og at VM går i Europa, så det var overkomeleg å delta. Det er deltakarar frå over 30 nasjonar, blant anna USA og Australia, fortel Kristoffer.

Fleire saker