Kultur | 25. des. 2017

«Osheim» blir privat bustad

Kjøparane fekk bruksendring. No blir villaen totalrenovert.

«Osheim» blir privat bustad
Osheim ein vinterdag før oppussingsarbeidet starta. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøymandag 25. des. 2017 21:18

Den har blitt kalla blant anna Osheim, Lensmannsboligen og Villa Sana, den over 130 år gamle villaen i Finnebrekka 29.

Villaen, som er på 365 kvm bruksareal (326 kvm primærrom), var eigd av Redd Barna fram til den blei overtatt av Fylkeskommunen i 1986. Frå 2002 til 2008 blei den av Helse Bergen brukt som behandlingsheim for born.

I 2012 blei villaen kjøpt av Kirkens Sosialtjeneste. I mai i år blei eigedomen lagt ut for sal.

Kjøpar var sambuarparet Ingelinn Karlsen Nordaas og Eirik Sjåstad Øvredal.

Villaen er SEFRAK-registrert. Bygningane i SEFRAK-registeret er i utgangspunktet ikkje tillagt spesielle restriksjonar. Registreringa fungerar meir som eit varsko om at kommunen bør ta ei vurdering av verneverdien før det eventuelt blir gitt løyve til å endra, flytta eller riva bygninga.

Frå oppussing på Hjellestad tilbake til Os

Øvredal og forloveden hadde ikkje plan om å riva villaen frå 1883.

Eirik har vakse opp i Bjørkhovda i Os. Der budde han saman med Ingelinn fram til dei bestemte seg for å prøva å bu der ho kjem frå, på Hjellestad.

– Vi hadde budd på Hjellestad i rundt eit år, i eit eldre hus som vi pussa opp, då Osheim kom for sal. Vi hadde akkurat byrja å diskutera å flytta opp igjen til Os, og då passa det godt med ein stor og fin einesbustad så nær Os sentrum, men samtidig i eit fredeleg nabolag langs Oselvo.

I oktober fekk dei godkjent bruksendring, til våren flyttar paret til Os med sine tre born, tvillingar på 6 år (gut og jente) og yngstemann på 5 månadar.

Men først - renovasjon!

Går grundig til verks

Osheim har tidlegare blitt pussa opp i fleire omgangar, men aldri så omfattande som det Ingelinn og Eirik no har sett i sving.

– Vi tar alt frå drenering av kjellar til skifting av vindauge, nytt vatn, avlaup og elektrisk, etterisolering av heile huset, balansert ventilasjon, nye bad, nytt kjøkken, avretting av alle golv og nye veggflater.

– Taket skal også skiftast på sikt, i første omgang har vi tatt taket på baksida da dette var i dårlig forfatning.

Tar vare på det gamle

Eirik fortel om store mengder avfall, nærmare 500 kubikk har blitt kasta.

– Det viste seg at ein del tidlegare oppussingsprosjekt har inkludert å legga noko nytt utanpå det gamle. I det eine innvendige taket reiv vi fem lag med panel. Sånt blir det fulle konteinarar av! Men vi måtte ha alt vekk for å koma inn til bjelkalaget, for å isolera på nytt og så vi fekk sjå at alt såg fint. Det har det heldigvis gjort, villaen er bygd på ein robust måte, med materialar av høg kvalitet.

Men ikkje alt blir kasta. Blyvindauge er tatt vare på, historiske detaljar som brystningspanel og originale dører blir renoverte og bevart. Lister rundt vindauge utvending blir rekonstruert ved hjelp av CNC fres og Heggland Heiltre.

– Vi har òg gjort eit par funn i løpet av rivingsarbeidet, seier Eirik, og seier Midtsiden skal få visa nokre av desse i ein oppføljar når villaen er klar til å bli bustad igjen.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.