Osing fann død oter

Bildeserie:

1 av 2

Klokka 6.30 laurdag morgon var Richard Walden på veg frå Os til Bergen.

På Kalandseid la han merke til noko som likna eit dyr i vegkanten.

– Det viste seg at det var ein død oter. Eg blei overraska, for eg var ikkje klar over at oter var vanleg her, seier Richard.

Kan ha vore gravid

– Den har truleg blitt påkjørt kort tid før eg kom, for den var framleis varm, fortel Richard.

Han tok skrotten med, har meldt frå om funnet og har søkt om å få stoppa den ut.

– Det er truleg ei ho, eg syntes eg kjente at noko rørte seg i magen, at den var gravid.

Over 100 funn av død oter

Oter kan bli opptil ein meter lang, halen kan bli opptil 55 cm. Den europeiske oteren lever i sjø, vatn og elver frå Russland til Nord-Afrika, også i Noreg, men har i mange år vore nesten utrydda i Hordaland.

– Bestanden byrja å ta seg opp for 10-12 år sidan. Oteren kom nok frå Sogn og nedover, og no er den observert også i Hardanger og sør til Bømlo, fortel Terje Haugland, oppsynsmann i Statens Naturoppsyn (SNO) i Hordaland.

Han jobbar med kartlegging av bestanden i fylket og registrerer funn av død oter, eit prosjekt BT skreiv om i 2007 og i 2011.

Har du funne oter? Då kan du registrera funnet på Fylkesmannen si side, vannportalen.no.

– Dei siste 10 åra har eg registrert 130 til 150 funn av død oter. At dei sit fast i fiskeutstyr er vanleg, og at dei blir påkjørt av bil når dei går frå eitt vassdrag til eit anna.

Nyleg funn også i Os

Haugland meiner han har høyrd om observasjon i Os, men kan ikkje seia dette sikkert.

Naturfotograf Oddmund Lunde har ikkje høyrd om funn i heimbygda, det nærmaste han kjenner til er ein oter som gjekk i ei ruse på Vernøyane utanfor Tysnes for tre år sidan.

Men naturfotograf og konservatør Helge Haukeland kan fortelja om eit ferskt funn i Os.

– Det er berre eit par månadar sidan eg fekk inn ein oter som blei funnen påkjørt mellom Uno X og Hetleflåten, fortel han.

Den store hannoteren skal stoppast ut hos Haukeland.

– Oterpels var svært ettertrakta og ei stor eksportvare frå Bergen før i tida. Pelsen er spesiell og veldig tjukk, og kan ha opptil utrulege 44.000 hår per kvadratcentimeter.

Freda art

Mens det er skotpremie på minken, som på mange måtar liknar ein liten oter, høyrer oteren til i norsk natur og er freda.

– Eg gjorde ein observasjon i Nord-Noreg ein gong, som var den første i Noreg. Eg såg det var mykje liv på ein liten holme med terner, så eg reiste ut for å jaga vekk det eg trudde var ein mink på eggjakt.

Men då Haukeland stakk åra inn i det tette, høge graset som ternene var fokusert på, fekk han seg ei overrasking.

Ut spratt ein stor oter.

– Det låg ekskrement igjen etter oteren, med fjør og bein i. Dette var ikkje første gong han har vore på holmen og forsynt seg. Oteren er kjent for å eta fisk, men tar tydelegvis også fugl. Slike observasjonar er visst gjort i Skottland tidlegare, av oter på fuglereservat, men ikkje i Noreg.

Les meir om oter på wikipedia og på forskingssida nina.no.