Osing lurte Løke

Bildeserie:

1 av 3

Noreg tapte 25-30 for Sverige i dagens Supercup-kamp i Hannover.

Men det som fekk mest merksemd etter handballkampen var plakaten med teksten: Frank har Norges største! Billig er han også - ring 957 08 175.

- Denne skal eg ta med og henge den på låven, sa handballspelaren Frank Løke til tv2sporten.no etter kampen.

- Eg tenkte ikkje over at det var ein på landslaget som heiter Frank, seier mannen bak plakaten, Klas Færøvik.

Mobilnummeret på plakaten går nemleg til ein Frank frå Os. Og han har faktisk Noregs største.

Godt tilbod
Då Macbox-eigar Klas Færøvik fekk tilbod om billig reklameplass under den TV 2-sendte handballkampen slo han til.

- Eg kjenner seljaren, og han hadde ein kunde som måtte trekka seg i siste liten. Eg takka ja, og bestemte meg på å finna på noko tull, seier Klas.

Frank Bruarøy frå Maxprint blei eit lett offer. Og Maxprint har Noregs største maskin for trykk på storformat, ein Vutek 5-meter.

- Frank minnar meg dessutan om han Frank som på den gamle Lotto-reklamen hadde bestilt namnet sitt som reklame på ein heil fotballstadion, seier Klas og ler.

Hotline
Frank sin mobiltelefon gjekk seg varm sundag ettermiddag.

- I starten av kampen fekk eg eit par telefonar og ein mms med bilde av Frank Løke ved sidan av plakaten, men ut i kampen blei det heilt vilt, seier Frank.

- Var det nokon som blei skuffa då dei fekk høyra kva det var som var så stort?

- He, he, nei det trur eg ikkje. Det var nok ingen som trudde at dette var ein kontaktannonse eller liknande.