Osingar på rek

Etter fire-fem dagar på fråkopla flytande hotell i Nordsjøen kunne dei 400 om bord på "Floatel Superior" koplast til Oseberg C igjen.

– Orkanen tok ei antenne på Oseberg C, så vi blei utan nett og vanleg telefon, seier Simon John Hamilton frå Søre Øyane.

Han var blant dei minst tre osingane som var om bord på den flytande hotellplattforma då den blei kopla frå.

– Sidan vi var utan internett desse dagane så blei det ikkje mykje jobb som kunne utførast. Men elles var det overraskande kor lite vi merka til orkanen og dei høge bølgjene.

80 knop i kasta

– Floatellet er bygd for å tola ruskete vêr, men når bølgjene er rundt fem meter høge vurderer leiinga å kopla frå den 38,5 meter lange brua for at ikkje denne skal bli skadd.

– Når bølgjene er 6 meter høge blir floatellet kopla av manuelt, og om ikkje dette skjer blir det automatisk kopla frå i det bølgjene er 8 meter høge, forklarar han.

I helga var vinden opp i 80 knop i kasta (63 er orkan). Bølgjene slo oppunder dekk, eit dekk som på oppsida er 35 meter over havflata.

Fekk trena, men ikkje ringa

Floatellet har kapasitet til 512 personar, restaurant til 220, trimrom, badstove og spelerom.

– Det gjekk fint å vera om bord, men sidan vi berre hadde radio og satellitt-telefon kunne vi ikkje ringa heim og forsikra alle at vi hadde det fint.

Hamilton fortel at det blei lange dagar utan jobbing, men at han fekk slått ihjel nokre timar ved å trena.

– Det var ingen problem å ta seg ein spinningtime medan det bles orkan rundt floatellet. Sånn sett var det eit fint cruise, seier Simon.

Her kan du lesa meir om det 91 x 94 meter store Floatel Superior.