Over 30.000 i gebyr

Statens vegvesen hadde trafikkontroll i Hjellemarka meir eller mindre heile dagen måndag. Frå klokka 10 til 15.30 kontrollerte dei 1.213 for bilbeltebruk, 1.580 bilar blei kontrollert av fotobilen med kjennemerke-gjenkjenning.

– 8 førarar og 4 passasjerar fekk gebyr for manglande bilbeltebruk (1500 kr), fortel Lars Harald Drange frå vegvesenet.

– I tillegg hadde vi 4 som ikkje hadde førarkort med seg (500 kr) og 1 som ikkje hadde vognkort i bilen (500 kr). Det var også ein med eitt utslitt dekk som fekk gebyr (750 kr).

10 av 21 blei avskilta

21 av bilane som blei sjekka var begjært avskilta, men 11 av desse ordna opp på staden og fekk halda skiltet på bilen.

Dei 10 som blei avskilta må betala 1.320 kroner kvar i påskiltingsgebyr, når bilen er klar for å få skilt igjen.

– Manglande forsikring og manglande periodisk kjøretøykontroll (EU-kontroll) er vanlegaste årsak. Ved nokre tilfelle av manglande forsikring er det folk som har fått tilbod hos nytt forsikringsselskap, og dette har sagt opp det gamle. Så oppstår gjerne ein konflikt med det gamle selskapet og bilen står utan forsikiring.

– Men ofte handlar det berre om manglande betaling. Uansett let det seg ofte ordna opp i per telefon på staden, så lenge du tar dette på dagtid.

Kor tid skal bilen din til EU-kontroll?

Det er også ein del som ikkje leverer bilen inn til EU-kontroll, eller som ikkje rettar opp feila som blir avdekka på kontroll sånn at bilen kan bli godkjent.

– Du får ikkje innkalling lenger, så du må følgja med sjølv. Men du kan ta kontrollen 4 månadar før og 2 månadar etter oppsatt dato, seier Drange.

På denne sida på vegvesen.no kan du tasta inn registreringsnummeret ditt for å få dato for neste kontroll.

– Eg vil også minna alle på å sjekka lysa no når vi går inn i den mørke årstida. Det er mange som kjører rundt med manglande lys, feile lyspærer eller pærer som er montert feil.