Overtar saman med Koss

Jarle Pedersen blei i dag ny sjef for skøytelandslaget. Assistenttrenar blir Johan Olav Koss.

Kjetil Vasby Bruarøyonsdag 25. nov. 2009 20:16

På ein pressekonferanse onsdag blei det stadfesta det mange trudde på førehand, osingen Jarle Pedersen (54) overtar jobben Peter Mueller tidlegare i veka mista; forbundstrenar i hurtigløp.

Ny i trenarteamet fram mot OL i Vancouver er også Johann Olav Koss, som får rolla som assistenttrener.

– No har vi lagt ein vanskeleg prosess bak oss og rettar fokus mot det sportslege og prestasjonane som skal gjerast på isen, seier Jarle Pedersen til skoyteforbundet.no.

Jarle er utdanna fysioterapeut, tidlegare OL-deltakar på skeiser og kjem frå jobben som hovudtrenar for Fana IL, der han blant anna har trent dei talentfulle sonane sine Eirik og Sverre.

- Første telefonen fekk eg frå Johan, som forklarte situasjonen og gav meg helga til å bestemma meg på. Livet mitt har dreid seg om skeiser heilt sidan eg vaks opp i Alta. Det seier seg sjølv at det ikkje er lett å seia nei når du får ein slik førespurnad, seier Jarle Pedersen til NRK Hordaland.

Sverre (17) er saman med Jarle i Oslo, og reiser torsdag til Calgary og seinare i desember til Salt Lake City for å delta i verdscup.

Midtsiden.no lukkast ikkje i å få tak i Sverre eller Jarle onsdag kveld.

Håvard Bøkko seier dette til Aftenposten.no:

- Når ting blei som dei blei trur eg dette er den beste løysinga vi kunne få.

Jarle Pedersen har blant anna leia det norske juniorlaget under VM og verdscup. Fleire av løparane som har representert Noreg under Pedersen i juniorklassen, er i dag på seniorlandslaget. Han var sjølv aktiv, og landslagsløpar på slutten av 70- og begynnelsen av 80-tallet, med blant anna 6. plass frå 500 meter i OL i Lake Placid 1980.