På cruising med Haugland og Thuen

Bildeserie:

1 av 30

Amcarutstilling, parade, nasjonalsong («The Star Spangled Banner»), frisk linedance og bluesrock, Er-An Veikro la opp til ei saftig feiring av den amerikanske nasjonaldagen i dag, og fekk full klaff.

– Eg er heilt imponert over korleis Dag (Andersen) har planlagt og gjennomførte paraden. Vi styrte unna ferjekøar frå både Halhjem og Hatvik og kom presis tilbake til Røykenes, seier Jarl Henning Hetleflåt frå Os Amcar Club om mannen til vegkro-Linda.

– Det var éin av amcar-kjørarane som heldt litt låg fart, så det kom noko ugras innimellom paraden, elles heldt vi fint saman heilt til vi nesten var tilbake.

Utan hatt i Cadillac

Midtsiden fekk plass i Rolf Haugland sin '62 Cadillac Eldorado Biaritz.

– «Biaritz» var eit namn dei brukte på dei meir eksklusive modellane. Eg har hatt han i 21 år, fortel Haugland om bilen.

– Då Pushwagner var her i sommar så kjørte eg han til Flesland i denne bilen. Han hadde greie på amerikanske bilar.

I den lekre veteranbilen sat også kameraten Erling Thuen. Sonen Sigve kjørte sin eigen amcar mens ein annan son, handbak-kjempen Arne, hadde gløymt noko viktig.

– Arne skulle koma til meg med cowboyhatt eg skulle gå med i dag, men eg får klara meg utan.

Norske og amerikanske flagg

Paraden, som gjekk frå Røykenes til Hegglandsdalen tur-retur frå klokka 12 til 13, fekk publikum fleire plassar.

Både på Søfteland, Flåten, Os sentrum og i Hegglandsdalen sto det folk langs vegen. Nokre hadde amerikanske flagg og hattar, andre hadde norske.

I Os sentrum hadde butikken Lilleballong pynta for dagen.

Vil du sjå heile konvoien? Erik Ask filma alle bilane då dei passerte Lyssand. Sjå videoen på Youtube.

Tilbake til song og småfrekk dans

På Røykenes var det duka for fest då paraden var tilbake. Linda Andersen ønskte velkomen før Eirik Søfteland song den amerikanske nasjonalsongen.

Cheerleaderane måtte melda avbod, Pretty Priceless Dancers var ingen dårleg erstattar.

– Hald på det du har, sa Linda før ho sleppte til tre av jentene frå bergensgruppa.

Så heldt Eirik fram på trommer, saman med Olav Skorpen på bass, for bluesrockaren Haavard Skaatun frå Fusa.

Festen er ikkje over, i skrivande stund er det fullt hus i teltet på Røykenes, med Lothepus, Mighty Magnolias og Blue Note Shuffle på scenen.