Jan Helge Gram Eggestøl frå Os Hagelag fortel at planteloppemarknaden vil gå av stabelen ved Baronselva laurdag føremiddag;
– I Os kommune er det mange som har kjøpt seg tomt, og som er i ferd med å etablere seg med hus og hage. Andre vil kanskje fornya hagen med nye planter. Slike innkjøp av planter er ofte kostbare, og på laurdag er det mogleg å få tak i planter til ein nokså rimeleg sum, fortel Eggestøl.
Kortreiste planter
Plantene som kjem for salg på laurdag har ikkje reist langt, fortel Eggestøl;
– Desse kjem frå ulike hagefolk i Os som hentar planter frå eigen hage, og som dei gjev vidare til Os hagelag.
– Det er rett slett «kortreiste» planter. Samstundes er du med og støttar Os Hagelag.
Under planteloppemarknaden blir det sal av ulike vekstar som bærbuskar, staudar, grønsaker, krydderplanter og sommarblomar.