På lyspatrulje

Bildeserie:

1 av 3

Sidan 1999 har det vore lys på Borgafjellet kvar jul, frå første sundag i advent til jula blir rydda ut i januar. Kva kostar dette av førebuing, og kven betaler gildet?

– Vi i Os Kulturutvikling har ansvar for å halda lysa i drift, og bruker ein del tid på førebuing i form av vedlikehald og innkjøp av tau og pærer, fortel nestleiar i styret Georg Jørgensen.

Sjølv har han vore til fjells fleire år for å tenna lysa, som oftast saman med barnebarna Mathias og Sondre.

Men han seier at det er andre i laget som gjer ein større porsjon arbeid for å laga julestemning i heile Bjørnefjordsregionen.

– Arne Martin Holen, som kom med ideen, har følgt prosjektet sidan han serverte tanken til Knut Natvik i 1999. Knut følgte opp, både som leiar for sentrumsforeininga og seinare Os Kulturutvikling. Dei siste åra har også rekneskapsføraren vår, Leif Ragnar Tveit, fysisk involvert seg.

På sponsorjakt

Det kostar cirka 15.000 kroner i året å halda prosjektet i gang.

– Nokre år får vi nesten alt dekka av sponsorar, andre år må vi ta det meste på eiga kappe.

– Skal vi driva med dette vidare treng vi stabil støtte kvart år, seier Jørgensen før den komande runden med jakt etter sponsorkroner.

Skifta 160 pærer

Kvar av dei tre lyslenkene er rundt 50 meter lange, og kvar lenke har cirka 100 pærer. Laurdag var Arne Martin Holen og Leif Ragnar Tveit til fjells for å sjekka forholda.

– Pærene er på berre 7 Watt, så det går ikkje så mykje straum. Det er pærene som er den største utgifta, vi skifta over halvparten av dei då vi laurdag var oppe for å gjera klart, fortel Arne Martin.

Lyslenkene er av typen som bruker pærer som no er ute av produksjon. Os Kulturutvkling har klart å hamstra opp eit lager, truleg nok til å klara seg gjennom årets jul, men ikkje nok til neste år.

– Vi har byrja å sjå på ulike alternativ og får nok ein stor jobb å gjera når nye lenkjer skal på plass neste haust.

Turgåarar hjelper til

Det hender at lyset på Borgafjellet går. Då kjem meldingane, både til media og til Os Kulturutvikling.

– Det bles litt på toppen av Borgafjellet, og det hender at ristinga i lyslenkene gjer at jordfeilbrytaren slår seg av. Men vi har vist mange turgåarar kvar skapet står, og dei er hjelpsame med å slå på brytaren om dei ser at lysa er av.

– Viss ikkje andre får lyset på tar vi turen sjølv. Det blir nokre turar til toppen av Borgafjellet kvar vinter, men færre og færre når vi får så god hjelp som no.

Ingen garanti

Førstkomande laurdag har dei plan om ny fjelltur, då for å hala opp lyslenkjene, éi og éi. I tillegg til pærer som ryk kan tauverket som blir brukt til å heisa lyslenkene skapa problem.

– Taua strekk seg litt når dei står i spenn, så det hender at dei viklar seg inn i ting på masta. Då har vi plutseleg ei kjempeutfordring.

– Det såg fint ut i helga, men vi veit aldri. Til no har vi hatt flaks med tenninga, men det er like spennande kvart år, seier Arne Martin Holen.

Sundag klokka 14 skal lysa tennast.