To på pallen i Bergen

Bildeserie:

1 av 3

Dei to tjueåringane Solveig Henriksen Nordhus og Ilana Markhus er begge frisørlærlingar på sisteåret.

No har dei deltatt i bergensmeisterskapen, som er open for både lærlingar og frisørar med fagbrev, og dei to lærlingane frå Lundehjørnet tok med seg kvar sin pokal heim frå SAS-hotellet.

– Det var ekstra spennande i år, juryen tok seg mykje betre tid til å studera modellane. Begge våre modellar har skjegg, og jurymedlemmane gjekk tett på, fortel dei to.

Solveig hadde Kristoffer Tysseland som modell, Ilana hadde frisert og styla Morten Njaastad Havre.

Frå topp til tå med hjelp av nabobutikken

Begge lærlingane hadde meldt seg på i klassen «herre full fashion». Dermed var det ikkje berre frisyre som blei vurdert.

– Vi måtte også ta ut antrekk og passa at skjegget sto i stil med ansiktsform og sveis.

Klede og sko fekk Kristoffer og Morten låna av nabobutikken til Lundehjørnet, Instinct i Telthuskvartalet.

Lik poengsum

Det var Jeanette Hauge frå Arna Frisør som vann bergensmeisterskapen.

– Vi såg med éin gong at ho kom til å stikka av med sigeren, ho hadde verkeleg laga noko spesielt, seier lærlingane frå Os.

Vinnaren fekk 87 poeng, Solveig og Ilana fekk begge 82 poeng. Då Ilana fekk best score hos hovuddommaren var det ho som stakk av med 2. plassen.

– Eg fekk 3. plass på same måte i fjor, med lik score som andreplassen. Då kom Ilana på 4. plass. Det var kjekkare å gje vekk andreplassen til ein kollega, synest Solveig.