På sommartur med skulekorpset
Dei bada i sol og dei bada i Sommarland i Bø, musikantane frå Nore Neset som i helga var på tur.
Bildeserie:
Denne helga vart den årlege Sommarlandfestivalen arrangert i Bø i Telemark. Nore Neset skulekorps frå Os ville testa ut denne møteplassen i år, etter demokratisk avstemming blant musikantane for kor dei skulle reisa på tur.
Sommarlandfestivalen ønskjer å vere ein møteplass for ulike musikkaktivitetar retta mot barn og ungdom, og i år var det 1500 påmelde. Gjengen frå Nore Neset skulekorps talte 25 personar, inkludert dirigent Kjersti Aak Garlid.
Festivalen starta fredag kveld med parade gjennom Bø sentrum, med to fellesnummer for korpsa, «Norge i rødt, hvitt og blått» og «Ja, vi elsker».
– Det var eit flott syn med 41 korps i samspel marsjerande gjennom sentrum, der dei blei motteken av ordføraren i Bø. Det er utruleg gøy å spela saman med så mange andre, seier ein av korpsungdomane frå Nore Neset i ei pressemelding frå korpset.
Konsertar og bading
Sommarlandfestivalen viste seg å vera ein allsidig festival, med både musikk, bading og mykje moro. Nore Neset heldt konsert laurdagen på Sønstebøtunet, og deretter bar det rett i Bø sommarland for fleire timar med vannland, magasuget, berg og dalbane i vatn, den populære surfebølga, og mykje anna vannleik, der til og med nokre av dei vaksne våga seg ein tur i magasuget.
- Sjølv om vi i hovudsak er her for å spela, tek vi oss alltid tid til sosiale aktiviteter når vi er på tur, seier leiaren i Nore Neset skulekorps, Ingunn Fykse.
Laurdagskvelden blei avslutta med diskotek, Konsert med Tov & The Pacemakers og show med den populære buktaleren Erik Mogeno og Kalle Kanin. Her fekk ein av aspirantane frå Nore Neset prøva seg som assistent til Mogeno sine tryllekunstar på scenen.
Søndag var det igjen klart for konsert, denne gongen i Bø Sommarland, før det bar heimover over fjellet med buss. Ein lang busstur, men med godt selskap, bingo, pizza stopp i Odda, og fleire gode røvarhistoriar, gjekk turen over fjellet ganske fort.
Avslutning for dirigent Garlid
Bø bada i solskin heile helga, noko som gjorde det ekstra kjekt å spela konsert og gå i parade - slike ein gjer på ekte festivalar.
– Dette var også avslutning for dirigenten Kjersti Aak Garlid, som har vore vikar når dirigenten til korpset har vore i morspersmisjon, seier Ingunn Fykse, leiar i Nore Neset skulekorps.
Ho nyttar høvet til å takka Garlid for det flotte arbeidet ho har lagt ned i skulekorpset.
– Det blei ein minnerik helg for medlemmane i Nore Neset skulekorps, avsluttar Fykse, som allereie no drøymer om kor turen med korpset skal gå neste gong.
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.