På toppen av 2. divisjon

Andredivisjonsklubben Åsane, med osingen Vegard Leikvoll Moberg i stallen, toppar tabellen for Oddsen-ligaen avdeling 3 etter siger i alle dei tre første kampane for sesongen.

– Vi er nøgd med starten på sesongen, seier Vegard Leikvoll Moberg.

Åsane har slått Notodden 3-1 heime og Egersund 3-1 borte før dei onsdag vann 2-0 over Vidar heime.

Vegard har spelt frå start og heile kampen i alle dei tre første rundane.

– Eg knakk ei tå i januar og mista ni veker av oppkjøringa, så eg er glad for at eg kom så raskt i form, og at eg fekk tillit allereie frå første kamp.

Grunna lang vinter og tele i jorda er det ulikt kor mange kampar dei forskjellige laga har spelt.

Vindbjart har 9 plussmål og full pott etter to rundar, og er einaste som kan gå forbi Åsane på tabellen i løpet av tredje runde.

Siger i 1 av 2 for Fredrik og Simen

Fredrik Heggland og Simen Lassen, som gjekk frå Os til Brann i haust, har vunne 1 av dei 2 første kampane med Brann 2 i Oddsen-ligaen.

Fredrik spelte frå start og 58 minutt av kampen då Brann 2 tapte 4-1 borte for Ålgård. Simen Lassen spelte ikkje frå start, men blei bytta innpå allereie etter 26 minutt.

Heggland spelte heile kampen då Brann 2 slo Fyllingsdalen 1-0 på måndag. Lassen blei sitjande heile kampen på benken.

Andre lag frå Hordaland i same avdeling:
2. plass: Nest Sotra, 7 poeng etter 3 kampar
6. plass: Arna Bjørnar, 6 poeng etter 3 kampar
11. plass: Fyllingsdalen, 3 poeng etter 3 kampar
13. plass: Brann 2, 3 poeng etter 2 kampar
14. plass: Fana, 3 poeng etter 4 kampar
SJÅ TABELL, 2. divisjon avdeling 3

To mål av Moldskred

Mats Cato Moldskred, som speler på nest høgaste nivå i Sverige, fekk ein god start i årets sesong i Superettan.

Mats Cato skåra på overtid då IK Brage slo Ängelholms FF 2-0 i serieopninga på bortebane.

Men det er einaste siger til no, etter seks rundar, for IK Brage.

Osingen Moldskred har skåra halvparten av dei fire måla til den svenske klubben, og hatt målgjevande pasning på det 3. av dei 4 måla.

Men IK Brage står med 1 siger, 1 uavgjort og 4 tap etter at 6. runde blei spelt torsdag.

Sjå tabell og speleprogram for Superettan.

Stabæk eit stykke unna Tippeliga-nivå

Tidlegare Os- og Brann-spelar Bjarte Haugsdal rykte med Stabæk i fjor ned til Adeccoligaen.

Der kan det førebels sjå ut som om serievinnarane i Tippeligaen i 2008 blir verande.

Haugsdal har spelt samtlege minutt av dei første fem kampane, men resultata til laget har ikkje vore gode.

Stabæk ligg på 11. plass med 0 sigrar, heile 4 uavgjorte og 1 tap.

Sjå tabell for Adeccoligaen.