Parkering - ikkje enkelt!

Parkering er ikkje enkelt, og det at vi no har starta handheving av parkeringsreglane har ført til mykje frustrasjon. Dette kjem ikkje minst fram i brev vi nyleg har motteke frå delar av handelstanden på Øyro.

Elles er det også kjekt å registrera at mange no også signaliserer at dei har stor tru på at dette på sikt vil betra tilhøva på Osøyro monaleg.

Vi som står ansvarlege for handhevinga vil seia oss leie for frustrasjonen denne eventuelt har førd med seg, særleg med tanke på at vi kanskje var noko kjapt ute. Sjølv om parkeringsreglane har vore gjeldande sidan tidleg nittital må vi samstundes vedgå at vi osingar ikkje har vore vane med handheving.

Omfattande prosessar med godkjenning av skiltplan, oppmerking av plassar o.l. har teke overraskande lang tid, men no er altså det heile godt på plass.

Skilta gjeld straks dei er synlege, og vi vil særleg peika på at det no er einvegskøyring ut Brugata, og dei som skal mot Hatvik må ta seg ein liten runde bortom Undino. Vi håper – og trur – at dette vil ha positiv verknad for både handlande og - ikkje minst - for tryggleiken til alle borna som går gjennom sentrum på veg til og frå skulen.

Den noko markante fysiske avgrensinga i krysset har synt seg naudsynt, men er berre midlertidig. Om kort tid vert det etablert heilt vanleg fortausavgrensing.

SMS-tenesta

Det nyaste irritasjonsmomentet har vore dei nye Easy-parkskilta som er komne opp. Denne SMS-tenesta er meint å vera eit ekstra tilbod til trafikantane.

For all del: det er framleis naturleg og fullt brukbart å bruka p-skiva eller å skriva parkeringstidspunktet på ein godt synleg lapp innom frontruta!

Dersom ein er uheldig og står utan skive eller lapp, eller kanskje ikkje er på Osøyro så ofte, er det altså mogeleg å senda ei sms-melding for å registrera parkeringa. Oppskrifta står nede på skiltet.

Du treng ikkje ringa, særleg ikkje dersom teknologien fungerer. Vi er gjort kjende med at nokre dagar har vore nokre tekniske problem med dette og at nokon jamvel har opplevd å få opplyst at ein treng vera abonnent for å nytta tenesta. Det er ikkje rett!

For ordninga i Os skal det berre gjelda at det kostar kr 10,- å senda sms, liknande system som vert nytta i mange andre samanhengar. Dersom ein ofte er stader der det er parkeringsavgift kan det derimot vera lønsamt å vera abonnent, for dette gjev rabattar for avgiftsparkeringa.

Bebuarparkering

I framlegget til avgiftsbudsjett for kommunen vert det gjort framlegg om å etablera høve til å “kjøpa seg” (eit avgrensa tal) parkeringsplass i sentrum, for kortare eller lengre periodar.

Dette vil verta klarlagt i samband med budsjettprosessen for 2012, med eventuelt vedtak i kommunestyret 6. desember.

8-timars parkering

Mange spør kvifor vi har vald 8 timars i randsonen av øyro i staden for til dømes 9. Dette er vurdert svært grundig, og svaret måtte nok verta 8. Ikkje noko gale sagt om pendlarar, men det er eit mål at desse parkerer andre stader enn i sentrumskjerna.

Vi har stor von om at den nye parkeringskvardagen etter kvart vil verta svært positiv for både handelstand og dei handlande, men vi er ikkje overraska over at dette må “gå seg til”.

Med helsing
Karl Ole Midtbø
Kommunalsjef